Nashik News : टपाल कार्यालयांची नावे स्थलांतरानंतरही कायम; नवीन नाव देण्यासाठी दिल्लीत मंत्रालयाची परवानगी गरजेची

Nashik News : शंभर- दीडशे वर्षांपूर्वी संपर्कासाठी आजच्यासारख्या सुविधा नव्हत्या. ही गरज हेरत तत्कालीन इंग्रज राजवटीत देशात इतर सुधारणांबरोबरच टपाल खात्याच्या कारभारास सुरवात झाली. नागरिकांच्या माहितीसाठी या खात्याच्या कोणत्याही शहरातील कार्यालयांना त्या त्या परिसराची नावे दिली गेली. कालौघात त्यातील अनेक टपाल कार्यालये स्थलांतरित होऊनही तीच नावे कायम राहिली आहेत. (Name of post offices remain even after migration )

मुख्य टपाल कार्यालयांच्या अंतर्गत टपाल व उपटपाल कार्यालये शहरात कार्यरत आहेत. प्रशासकीय कारणास्तव त्या कार्यालयांची ओळख म्हणून त्या कार्यालयांना ते कार्यरत असलेल्या परिसराची नावे देण्याची पद्धत इंग्रज काळापासून रूढ आहे. तीच पद्धत स्वातंत्र्यानंतरही सुरू राहिली. पंचवटी विभागासाठी दिंडोरी रोडवरील महालक्ष्मी थिएटरजवळ मुख्य टपाल कार्यालय अस्तित्वात होते.

कालांतराने हे कार्यालय गणेशवाडीतील महापालिकेच्या जागेत स्थलांतरित झाले, परंतु अद्यापही या कार्यालयाची तीच ओळख कायम आहे. पुरिया पार्कसमोर पुरिया पार्क टपाल कार्यालय अनेक वर्षे अस्तित्वात होते. पुढे हे कार्यालयही गणेशवाडीत व नंतर रविवार कारंजावर स्थलांतरित झाले, तरी त्याचे नाव तेच कायम राहिले. (latest marathi news)

बोहोरपट्टीतील सरकारवाडा पोलिस चौकीसमोर पोस्ट ऑफिस कार्यरत होते, शहराच्या मध्यवस्तीत असल्याने त्याचे नाव सिटी पोस्ट ऑफिस होते. आता हे टपाल कार्यालय स्थलांतरित होऊनही तेच नाव कायम आहे. रविवार पेठ टपाल कार्यालय पूर्वी या परिसरातील हिरालाल गल्लीत होते, पुढे त्याचेही स्थलांतर झाले.

मेनरोड टपाल कार्यालय पूर्वी तळमजल्यावर कार्यरत होते, आता ते त्याच ठिकाणी तिसऱ्या मजल्यावर स्थलांतरित झाले आहे. काळाराम मंदिर उत्तर दरवाजाजवळ पूर्वी काळाराम मंदिर टपाल कार्यालय होते, सध्या ते नारोशंकर शिव मंदिरासमोरील महापालिकेच्या इमारतीत स्थलांतरित झाले आहे, परंतु त्याची ओळख अद्यापही काळाराम मंदिर टपाल कार्यालय अशी राहिली आहे.

सेवा अबाधित ठेवण्याचा प्रयत्न : वाणी

जागा उपलब्ध झाल्या, त्यानुसार त्या विभागांत टपाल कार्यालयांची निर्मिती करण्यात आली. प्रशासकीयदृष्ट्या संबंधित कार्यालयांना ओळख म्हणून त्या परिसराची नावे देण्यात आली. कार्यालय स्थलांतरित झाल्यावर नवीन नाव देण्यासाठी दिल्लीत मंत्रालयाची परवानगी घ्यावी लागते, ही पद्धत क्लिष्ट व वेळखाऊ असल्याने तीच नावे कायम ठेवण्यात आली. मात्र नागरिकांना देण्यात येणारी सेवा अबाधित ठेवण्याचा खात्याचा प्रयत्न असल्याचे नाशिक विभागाचे वरिष्ठ टपाल अधीक्षक प्रफुल्ल वाणी यांनी सांगितले.