नाशिक : परवाना शुल्कवाढीला शिवसेनेचा विरोध

नाशिक : महापालिका हद्दीत जागा परवाना शुल्कात वाढ करण्याचा प्रशासनाने सादर केलेल्या प्रस्तावाला शिवसेनेने विरोध केला आहे. दहा वर्षात न झालेली वाढ एकाच वर्षात करून प्रशासन कष्टकरी नागरिकांवर अन्याय करत असल्याचे निवेदन विरोधी पक्षनेते अजय बोरस्ते यांनी महापौर सतीश कुलकर्णी यांना दिले आहे. प्रस्ताव मंजूर झाल्यास आंदोलनाचा इशारा देण्यात आला आहे.

कोरोना पार्श्‍वभूमीवर अनेकांच्या रोजगारावर परिणाम झाला आहे. लॉकडाउनमुळे हिरावलेला रोजगार व संपत आलेली बचत यामुळे हा वर्ग मेटाकुटीला आला आहे. अर्थचक्र पुन्हा रुळावर येत असताना महापालिकेने या वर्गासाठी प्रस्तावित केलेली परवाना शुल्कातील वाढ अन्यायकारक आहे. यामुळे या वर्गाचे संपूर्ण आर्थिक नियोजनच कोलमडण्याची दाट शक्यता आहे.

हा सर्व वर्ग किरकोळ विक्रेत्यांचा आहे. यामध्ये फटाके, विटा, लाद्या, साबण तयार करणे, तेल गाळणे, साबुदाणा कारखाना, मुरमुरे तयार करणे यासारख्या किरकोळ व्यवसाय करणाऱ्या विक्रेत्यांचा समावेश आहे. या वाढीमुळे या सर्व वर्गाला मोठया प्रमाणात आर्थिक भूर्दंड बसू शकतो. ज्या वर्गाला आज १० रुपयेदेखील महत्त्वाचे आहे. त्यांच्यासाठी १००० रुपयांपर्यंतची वाढ आवाक्याबाहेरची आहे. त्यामुळे शहरातील कष्टकरी व हातावर पोट भरणाऱ्या वर्गावर होत असलेली ही शुल्क वाढ महासभेत नामंजूर करावी, अन्यथा या विरुद्ध या वर्गाला सोबत घेऊन शिवसेना रस्त्यावर जनआंदोलन उभारेल असा इशारा महापालिकेचे गटनेते अजय बोरस्ते यांनी दिला आहे.