Nashik News : नाशिक रोडला आरटीओचे कार्यालय होण्याचा मार्ग मोकळा

नाशिक रोड : राज्य परिवहन मंडळाच्या (एसटी) नाशिक रोड येथील आर्टिलरी सेंटर रोडवरील जागा प्रादेशिक परिवहन विभागाला (आरटीओ) हस्तांतरित करण्याबाबत खासदार हेमंत गोडसे व माजी नगरसेविका ज्योती खोले यांनी मुख्यमंत्र्यांकडे पाठपुरावा केला होता.

त्यानंतर गुरुवारी आरटीओच्या अधिकाऱ्यांनी मैदानाची परिसराची पाहणी केली. दरम्यान, नाशिक रोडला आरटीओचे विभागीय कार्यालय होण्याचा मार्ग मोकळा होणार शक्यता आहे. (Nashik Road cleared for RTO office Nashik News)

हेही वाचा : जीएसटीसाठी नोंदणी केलीच नाही तर??

आर्टिलरी सेंटर रोड येथे पडीक असलेली साडेपाच एकर जागा सिंहस्थ काळात एसटी विभागाने डेपोसाठी ताब्यात घेतली होती. कुंभमेळ्यात या डेपोतून एसटी बाहेर काढताना वाहतूक कोंडी होत होती. तसेच अपघाताचीही भीती होती.

त्यामुळे प्राथमिक विकास कामे करूनही ही डेपोची जागा वापरात नव्हती. त्यामुळे ती आरटीओला हस्तांतरित करून त्या ठिकाणी आरटीओचे नाशिक रोड विभागीय कार्यालय निर्माण करण्याची मागणी होती. आरटीओचे मोटर वाहन निरीक्षक किशोर पवार, देवळाली गाव शिवारातील तलाठी खैरनार आदींनी एसटी विभागाच्या ताब्यात असलेल्या जागेची पाहणी केली, छायाचित्रण केले.

तलाठी खैरनार यांनी जागेचे कागदपत्र सादर केल्यानंतर त्याची शहानिशा करण्यात आली. याबाबत लवकरच मुख्यमंत्री कार्यालयाला प्रस्ताव सादर करणार असल्याबाबत निरीक्षक पवार यांनी सांगितले. माजी नगरसेविका ज्योती खोले, शिवसैनिक श्यामराव खोले आदींसह प्रादेशिक परिवहन विभागाचे अधिकारी, कर्मचारी उपस्थित होते.