Nashik Sweeper Murder Case : सोशल मीडियावर ॲक्टिव्ह मोरे पोलिसांना सापडेना; सफाई कामगार खून प्रकरण

नाशिक : पंडित कॉलनीत सफाई कामगार आकाश धनवटे याच्या निर्घृण खून प्रकरणात सराईत गुन्हेगार व भाजप माथाडी सेलचा पदाधिकारी व्यंकटेश मोरे याचे नाव आले आहे. मात्र, घटना घडल्यापासून पसार झालेला संशयित मोरे सोशल मीडियावर ॲक्टिव्ह असून पोस्ट टाकतो आहे. तर, दुसरीकडे पोलिसांनी त्यांच्या अटकेसाठी पथके रवाना केली मात्र अद्याप तो हाती लागलेला नाही. यासंदर्भात मात्र शहराच्या राजकीय वर्तुळात पोलिसांवर दबाव असल्याची चर्चा आहे. (Sweeper Murder Case Police could not find More active on social media )

मंगळवारी (ता. १) सकाळी साडेसहाच्या सुमारास पंडित कॉलनीत सफाई कर्मचारी आकाश धनवटे याच्यावर तिघा संशयितांनी कोयता, चॉपरने वार करून निर्घृण खून केला. याप्रकरणी त्याचा भाऊ मकरंद उर्फ सोमा संतोष धनवटे (रा. घारपुरे घाट) याच्या फिर्यादीनुसार, व्यंकटेश मोरे, मकरंद देशमुख, अथर्व दाते, अक्षय तरे यांच्यासह एका अल्पवयीन मुलाविरुद्ध खुनाचा गुन्हा सरकारवाडा पोलिसात दाखल आहे. पोलिसांनी अवघ्या ९ तासात अल्पवयीन मुलासह तिघांना पेठमधून अटक केली होती.

संशयितांच्या चौकशीतून सराईत गुन्हेगार मोरे याने आकाशला मारण्यासाठी दबाव टाकला होता, अशी माहिती समोर येत आहे. मोरेच्या अटकेसाठी पोलिसांची पथके त्यांच्या मागावर पाठविली असल्याचे पोलिस अधिकारी सांगतात. परंतु दुसरीकडे मोरे याने सोशल मीडियावर नवरात्रोत्सव आणि मराठी भाषेला अभिजात दर्जा दिल्यासंदर्भात शुभेच्छाच्या पोस्ट टाकल्या आहेत. तर दुसरीकडे तो पोलिसांच्य हाती लागत नसल्याचे आश्चर्य व्यक्त होते आहे.