Nashik Unseasonal Rain : सिन्नर तालुक्यात शुक्रवारी 7 वाजेच्या दरम्यान पावसाच्या सरी..

सकाळ वृत्तसेवा : विकास गिते

सिन्नर : मार्चमध्ये रखरखते ऊन तापण्यास सुरुवात झालेली असताना, शुक्रवारी ढगाळ वातावरणामुळे सूर्यदर्शन दुर्लभ झाले होते. जिल्ह्यात बहुतांश भागात अधून-मधून पावसाची रिमझिम सुरू होती. ऐन गहू, ज्वारी, हरभरा काढणीच्या वेळेस पावसाने हजेरी लावल्यामुळे बहुतांश भागात ज्वारी सोंगणी, गहू काढणीच्या कामे उरकण्यात बळिराजा व्यस्त असल्याचे दिसून आले. (Nashik Unseasonal Rain rained in Sinnar taluka)

शुक्रवारी सकाळी, तसेच दुपारी काही मिनिटे तुरळक पाऊस झाला. त्यामुळे काही भागात काढणीस आलेला गहू, हरभरा भिजल्याने शेतकऱ्यांचे नुकसान होण्याची भीती निर्माण झाली आहे. तालुक्यात देवपूर पंचक्रोशीतील या भागात सकाळी पावसाच्या हलक्या सरी कोसळल्या.

तालुक्यात व ग्रामीण परिसरात दिवसभर ढगाळ वातावरण होते. सध्या काही भागात गहू शेतात उभा आहे. त्यामुळे गहू सोगण्यासाठी शेतकऱ्यांची धांदल उडाली. बेमोसमी पाऊसामुळे हाताशी आलेले पीक वाया जाण्याच्या भितीने शेतकऱ्यांची चिंता वाढली आहे. तसेच काही ठिकाणी द्राक्ष बागा असल्याने थोड्याफार प्रमाणात नुकसान होण्याची भीती निर्माण झाली आहे.

सिन्नर शहरात शुक्रवारी सकाळी पावणेदहा वाजेच्या दरम्यान पावसाने अचानक हजेरी लावली असल्याने नागरिकांची धावपळ उडाली तसेच घरातून निघालेले नागरिक यांनी दुकानाचा आडोसा घेतला.

दोन्ही ऋतूंचा आरोग्यावर परिणाम होण्याची शक्यता

कधी कडक ऊन तर कधी ढगाळ वातावरण या दोन्हीही वातावरणामुळे आरोग्यावर परिणाम होण्याची शक्यता नाकारता येत नाही. त्यातच ज्येष्ठ तसेच लहान मुलांमध्ये या वातावरणामुळे खोकला, ताप, डोके दुखणे अशी समस्या निर्माण होण्याची शक्यता होत असून, सकाळी कडक ऊन तर अधून मधून ढगाळ वातावरण या सर्व गोष्टींचा आरोग्यावर परिणाम होत असल्याचे तज्ज्ञांनी सांगितले आहे. त्यामुळे नागरिकांनी योग्य खबरदारी घेऊन टोपी, गॉगल, रुमाल या गोष्टींचा वापर करावा व जास्तीत जास्त उन्हाळ्यात पाणी प्यावे असा सल्ला तज्ञांनी दिला आहे.