Nashik ZP Digital School : शाळांचे डिजिटलायझेशन, रंगकाम पेंटरांच्या पथ्थ्यावर! जिल्ह्यातील कामांमुळे मिळतो रोजगार

Nashik ZP Digital School : शिक्षणाच्या नव्या प्रवाहात सर्वत्र बदलाचे वारे वेगाने वाहत आहेत. मुख्यमंत्री माझी सुंदर शाळा' या उपक्रमाने डिजिटल रंगरंगोटीला पुन्हा जोर मिळाला. बदलत्या तंत्रज्ञानात आपली शाळा आकर्षक व्हावी यासाठी जिल्हा परिषदेच्या शाळांमध्ये मोठ्या प्रमाणात डिजिटल चळवळ विस्तारली आहे. शाळेचे बाह्यांग व अंतरंग आकर्षक करण्यासाठी रंगरंगोटीचा वापर होत आहे. (Nashik ZP Digital School employment through zp schools of painter marathi news)

यामुळे या शाळांच्या माध्यमातून थोड्या फार प्रमाणात रोजगार मिळाला आहे. अलीकडे रंगकाम मजूर महाग झाला आहे. एक वर्गखोली रंगविणे, चित्रमय करणे यासाठी १५ ते १८ हजार रुपये खर्च लागत आहे. यात शाळेचा व्हरांडा बोलका करणे, शाळेतील स्मार्ट क्लासरूम अंतर्गत कार्टून, पक्षी-प्राणी यांचे चित्र, विविध तक्ते, बाहा भागात स्वच्छता संदेश, फर्निचरवर नावे टाकून घेणे, समित्या फलक लेखन, प्रवेशद्वार रंगविणे आदी कामांची मजुरी, त्यासाठी रंगकाम व शाळेची सजावट याची खर्चाची महागडी बाजू पाहता अनेक शिक्षक स्वतःच आपला वर्ग 'डिजिटल' करीत आहेत.

मोठ्या प्रमाणात डिजिटल, ई- लर्निंग, ज्ञानरचनावादी, मॉडेल स्कूल झाल्या आहेत. या सर्वच शाळांमध्ये रंगरंगोटी, वर्गखोल्या रंगकाम करण्यात आले. या बदलणाऱ्या शाळांसाठी ग्रामस्थ, शिक्षणप्रेमी नागरिक, युवक मंडळे, गावस्तरावरील सर्व पदाधिकारी, अनेक संस्था, रोटरी क्लब, सेवाभावी घटक सरसावले आहेत. सर्वत्र आकर्षक व स्वच्छ, सुंदर वातावरणामुळे अनेक विद्यार्थी खासगी शाळांकडून पुन्हा परत येत आहेत. भिंतीसाठी पेंटींग व रंगकामामुळे पेंटरांना चांगला आधार आहे.(latest marathi news)

''डिजिटल शाळांच्या कामामुळे अनेक पेंटर बांधवांना रोजगार उपलब्ध झाला आहे. सुटीच्या दिवशीही गुरुजी स्वतः रंगकाम करून घेण्यासाठी सहकार्य करतात. चित्रकार म्हणून आमच्या कलेचे मोल होत नाही, पण या कामांमुळे काहीशी दिलासा मिळत आहे.''- मनोज आहिरे, पेंटर, रावळगाव (ता. मालेगाव)

''ग्रामीण भागातील बहुतेक सर्व शाळांमध्ये आकर्षक पेंटिंग्ज केल्याने शाळा बोलक्या झाल्या. विद्यार्थ्यांनाही आपली शाळा चित्रमय झाल्याने आनंददायी व मनोरंजक वातावरण प्रसन्न वाटते.''- छाया पाटील, शिक्षिका, हनुमाननगर प्राथमिक शाळा