Nashik News : 'त्या' चिमुकलीचा मृत्यू डॉक्टरांच्या हलगर्जीपणामुळेच; चौकशी अहवालात डॉक्टर दोषी पण नावेच नाहीत

नाशिक- चिमुकलीचा मृत्यू वैद्यकीय पदव्युत्तर महाविद्यालयातील (जिल्हा शासकीय रुग्णालय) डॉक्टरांच्या हलगर्जीपणामुळे झाल्याचे चौकशी अहवालातून निष्पन्न झाले आहे. परंतु चौकशी अहवालात संबंधित डॉक्टरांची नावेच नसल्याने, आता पोलिसांनी जिल्हा रुग्णालयाकडे संबंधित डॉक्टरांच्या नावांची विचारणा केली आहे..अंबड पोलिस ठाण्यात चिमुकलीवर उपचार करणाऱ्या डॉक्टरांविरोधात सदोष मनुष्यवधाचा गुन्हा दाखल करण्यात आला आहे; दरम्यान, चौकशी अहवालात उपचार करणाऱ्या डॉक्टरांची नावे देणे हेतुपुरस्सरपणे टाळत, त्यांना वाचविण्याचा प्रयत्न होत आहे का, असा प्रश्न उपस्थित होतो आहे. .माहेश्वरी अमर कांबळे (वय दीड वर्षे, रा. चुंचाळे शिवार, अंबड) हिच्या अंगावर गरम पाणी सांडल्याची घटना १४ जून २०२४ ला सकाळी घडली होती. यात ती १८ टक्के भाजली होती. जिल्हा रुग्णालयाच्या जळीत कक्षात तिच्यावर उपचार सुरू असताना, दोन दिवस तिच्या उपचाराकडे जाणीवपूर्वक दुर्लक्ष केले गेले. १६ जूनला दुपारी तिचा मृत्यू झाला. त्यानंतर संबंधित डॉक्टर व स्टाफने दोन तास ही माहिती तिच्या पालकांपासून लपवून ठेवल्याचाही आरोप पालकांनी केला आहे..याप्रश्नी पालकांनी जिल्हा रुग्णालयाकडे तक्रार अर्ज केला होता; परंतु दाद मिळत नसल्याने त्यांनी पोलिसांत धाव घेतली होती. त्यामुळे अखेर जिल्हा रुग्णालयाने जिल्हास्तर तज्ज्ञ समितीमार्फत चौकशी करण्याचे आदेश जिल्हा शल्यचिकित्सकांनी गेल्या जानेवारीत दिले होते. त्यानुसार चौकशी होऊन हा अहवाल जिल्हा शल्यचिकित्सकांनी बंद लिफाफ्यात पोलिसांना दिला. त्यानुसार अंबड पोलिस ठाण्यात जिल्हा रुग्णालयात त्या वेळी ऑनड्यूटी असलेल्या डॉक्टरांविरोधात सदोष मनुष्यवधाचा गुन्हा दाखल करण्यात आला आहे. गुन्ह्याचा तपास सहाय्यक पोलिस निरीक्षक दिलीप भंडे करीत आहेत..पोलिसांकडून पाठपुरावाचौकशी समितीच्या अहवालात मोघमपणे हलगर्जीमुळे मृत्यू झाल्याचे म्हटले आहे; परंतु संबंधित डॉक्टरांची नावे मात्र देण्यात आलेली नाहीत. त्यामुळे अंबड पोलिसांनी जळीत कक्षाच्या त्या दिवसाच्या ऑनड्यूटी डॉक्टरांविरोधात गुन्हा दाखल केला आहे. पोलिसांनी जिल्हा शल्यचिकित्सकांकडे संबंधित डॉक्टरांची नावे मिळावीत, असा पत्राद्वारे पाठपुरावा केला आहे. त्यामुळे जिल्हा रुग्णालय पोलिसांना नावे देणार की माहेश्वरीच्या पालकांना हेलपाटे मारायला लावले तसेच पोलिसांना करणार, याकडे आता लक्ष आहे..चौकशी अहवालावरच शंका जिल्हा रुग्णालयाच्या जिल्हास्तर तज्ज्ञ समितीमार्फत माहेश्वरी कांबळे हिच्यावरील उपचार व मृत्यूसंदर्भातील चौकशी करण्यात आली. त्यात हलगर्जी झाल्याचे निष्पन्न झाले; परंतु या चौकशी अहवालात समितीने संबंधित डॉक्टरांची नावेच दिलेली नाहीत. त्यामुळे हलगर्जीचा ठपका नेमका कोणावर ठेवण्यात आला? संबंधित दोषी डॉक्टरांची नावे न देता चौकशी अहवाल देता येतो का? की त्या डॉक्टरांना वाचविण्याचा प्रयत्न होतो आहे? होत असेल तर कोण त्या डॉक्टरांना वाचवितो आहे, असे एक ना अनेक प्रश्न यानिमित्ताने उपस्थित होत आहेत. .जिल्हा रुग्णालयाच्या चौकशी अहवालानंतर चिमुकलीच्या मृत्यूस कारणीभूत ठरल्याप्रकरणी गुन्हा दाखल केला आहे. मात्र अहवालात डॉक्टरांची नावे नाहीत. त्यासाठी जिल्हा शल्यचिकित्सकांकडे पत्राद्वारे पाठपुरावा केला आहे. नावे येताच गुन्ह्यात त्यांचा समावेश केला जाईल. -मनोहर कारंडे, वरिष्ठ पोलिस निरीक्षक, एमआयडीसी पोलिस चौकी, अंबड.सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.

Nashik News : 'त्या' चिमुकलीचा मृत्यू डॉक्टरांच्या हलगर्जीपणामुळेच; चौकशी अहवालात डॉक्टर दोषी पण नावेच नाहीत

Related Stories