शिवसेनेत पंधरा वर्षांनंतर नविन पदाधिकाऱ्यांच्या नियुक्त्या

मालेगाव (जि. नाशिक) : नाशिक जिल्ह्यातील मालेगाव, बागलाण, चांदवड व दिंडोरी तालुक्यातील शिवसेना पदाधिकाऱ्यांच्या नवीन नियुक्त्या शिवसेना मध्यवर्ती कार्यालयातून जाहीर करण्यात आल्या आहेत. मालेगाव तालुक्यात तब्बल दीड दशकानंतर शिवसेनेत खांदेपालट झाले आहेत. तालुकाप्रमुख असलेल्या संजय दुसाने यांची जिल्हा संघटक म्हणून नियुक्ती करण्यात आली असून, तालुका प्रमुखपदी ज्येष्ठ नेते मनोहर बच्छाव यांची, तर बाजार समितीचे उपसभापती सुनील देवरे यांची उपजिल्हाप्रमुखपदी नियुक्ती करण्यात आली आहे. महानगरप्रमुख पदाची जबाबदारी नगरसेवक राजाराम जाधव यांच्यावर सोपविण्यात आली आहे. नवनियुक्त पदाधिकाऱ्यांमध्ये श्री. भुसे (Dada Bhuse) यांचे वर्चस्व आहे.

मुख्यमंत्री तथा पक्षप्रमुख उध्दव ठाकरे (Uddhav Thackeray) यांच्या आदेशाने या नियुक्त्या करण्यात आल्या आहेत. उर्वरित नवनियुक्त पदाधिकाऱ्यांमध्ये उपजिल्हा प्रमुखपदी रामा मिस्तरी, मालेगाव बाह्य सहसंपर्कप्रमुख प्रमोद पाटील, मालेगाव मध्य सहसंपर्कप्रमुख मोहंमद आसिफ मोहंमद इस्माईल, विधानसभा संघटक शशिकांत निकम, कार्यालयप्रमुख प्रमोद शुक्ला यांचा समावेश आहे.

नवनियुक्त पदाधिकाऱ्यांचे कृषिमंत्री दादा भुसे, उपमहापौर निलेश आहेर, माजी उपमहापौर सखाराम घोडके, बाजार समिती सभापती राजेंद्र जाधव, माजी जिल्हा परिषद सदस्य सुरेश पवार आदींसह अनेकांनी अभिनंदन केले आहे.