Nashik News : NMC प्रशासनाचा थकबाकीदारांना नळजोडणी खंडीत करण्याचा इशारा

मालेगाव (जि. नाशिक) : महानगरपालिका क्षेत्रातील सर्व मालमत्ता मिळकतधारक व नळ कनेक्शनधारकांना महापालिका कर विभागातर्फे मिळकतधारक, भोगवटादारांना मालमत्ता कराचे व नळ कनेक्शनधारकांना पाणीपट्टीचे देयके पाठविण्यात आली आहेत.

शहरातील ज्या करदात्यांनी कराचा भरणा अद्यापही केलेला नाही अशा करदात्यांना नियमाप्रमाणे अंतिम सूचनापत्र व नळ कनेक्शन धारकांना अंतिम नोटीस देण्यात आली आहे. यानंतरही कराचा भरणा न करणाऱ्यांची स्थावर मालमत्ता जप्त करणे व नळजोडणी खंडीत करण्याची कारवाई करण्याचा इशारा प्रशासनाने दिला आहे. (NMC administration warns defaulters to disconnect water supply Nashik News)

हेही वाचा : मेडिकल मॅनेजमेंटही हृदयविकारावर ठरु शकते उपाय

मालमत्ता करात १ जानेवारी ते ३१ जानेवारी २०२३ पर्यंत ७० टक्के दंडनीय व्याजात सूट तर १ फेब्रुवारी ते २८ फेब्रुवारीपर्यंत दंडनीय व्याजात ५० टक्के सुटे देण्यात आलेली आहे. या संधीचा करधारकांनी लाभ घ्यावा. मिळकत जप्ती व मालमत्ता लिलावाची कटु कारवाई टाळावी. असे आवाहन केले आहे.

मालमत्ता कर व पाणीपट्टी कर थकबाकी वसुलीसाठी आजपासून ३१ मार्चपर्यंत शनिवार, रविवार व सार्वजनिक सुट्टी वगळता प्रभाग कार्यालयात वसुली, कराचा भरणा स्वीकारण्यासाठी नागरी सुविधा केंद्र नियमित कार्यालयीन वेळेत सुरू असेल. शहरवासियांनी कराचा भरणा वेळेत करून मनपास सहकार्य करावे असे आवाहन करण्यात आले आहे.