'इथं' शनिवारपासून होणार कांदा लिलाव...मात्र टोकन घेणे अनिवार्य!

नाशिक : (येवला) शेतकऱ्यांची गैरसोय टाळण्यासाठी येथील कृषी उत्पन्न बाजार समितीत शनिवार (ता. 18)पासून कांदा लिलाव सुरू करण्याचा निर्णय झाला आहे. मात्र शेतकऱ्यांना आदल्या दिवशी बाजार समितीत येऊन ट्रॅक्‍टरची नोंदणी करावी लागणार असून, नोंदणी झालेल्या शेतकऱ्यांना लिलावात सहभागी होण्याचे टोकन दिले जाणार आहे. त्यामुळे नोंदणी करा आणि मगच लिलावाला ट्रॅक्‍टर येवल्यात आणा, असे आवाहन सभापती उषा शिंदे, उपसभापती गणपत कांदळकर यांनी केले आहे. 

प्रवेशद्वारावर टोकन (गेटपास) दाखवून प्रवेश

यासंदर्भात बुधवारी (ता. 15) बाजार समितीत सभापती उषा शिंदे यांच्या अध्यक्षतेखाली कांदा व्यापाऱ्यांची बैठक झाली. बैठकीला संचालक संतू पा. झांबरे, भास्कर कोंढरे, व्यापारी संचालक नंदू अट्टल, सचिव कैलास व्यापारे यांच्यासह व्यापारी उपस्थित होते. नोंदणी नसणाऱ्या शेतकऱ्यांनी ट्रॅक्‍टर येवल्यात आणू नये, असे आवाहन बाजार समितीने केले आहे. अंदरसूल उपबाजार आवारावरही शनिवारपासून लिलाव सुरळीत होणार असून, भुसार धान्य मालाचे लिलाव शुक्रवार (ता. 17)पासून सुरू होणार असल्याची माहिती सचिव व्यापारे यांनी दिली. येवल्यात दररोज पहिल्या 500 ट्रॅक्‍टरची, तर उपबाजार अंदरसूल येथे 300 ट्रॅक्‍टरची कांदा लिलावासाठी नोंदणी होईल. शनिवारी सकाळी सहानंतर प्रवेशद्वारावर टोकन (गेटपास) दाखवून प्रवेश दिले जाणार आहेत. 

हेही वाचा > कोरोनाच्या भितीने पत्नीला पाठवले माहेरी...स्वत:ला कोेडले घरात! अन् मग...

लिलाव व्हावेत आणि गर्दी होऊ नये, यासाठी नोंदणीचा पर्याय निवडला आहे. शेतकऱ्यांनीही गर्दी न करता कांदे विक्रीला आणावेत. वाहनासोबत एकाच व्यक्तीने आवारात मास्क, रुमाल बांधून यावे व लिलावात सोशल डिस्टन्सिंगचे पालन करणे त्यांच्यावर बंधनकारक राहील. पुढील दिवसाचे कांदा लिलावासाठी नोंदणी आदल्या दिवशी सुटीचे वार सोडून होईल. - उषा शिंदे, सभापती, बाजार समिती, येवला  

हेही वाचा > ''मालेगावात आता पेट्रोलपंपांवर फक्त सरकारी वाहनांनाच इंधन मिळणार''