एचआर-सीटी तपासणीतून नाशिकच्या रुग्णांचे वाचले साडेबावीस लाख

नाशिक रोड : २ मे २०२१ ला नाशिक रोड येथील बिटको कोविड सेंटरमध्ये (bytco covid center) एचआर-सीटी (HRCT) तपासणी सुरू झाल्यापासून सामान्य गरीब, रुग्णांचे आजपर्यंत तब्बल २२ लाख पन्नास हजार रुपये वाचले आहेत. आजपर्यंत एक हजार ४०० रुग्णांची एचआर-सीटी तपासणी पूर्ण झाली असून, प्रत्येक तपासणीमागे किमान हजार ते पंधराशे रुपये प्रत्येकी एका रुग्णाला फायदा झाला आहे. (patients-saved-money-From-HR-CT examination-jpd93)

सामान्य गरीब, रुग्णांचे आजपर्यंत तब्बल २२ लाख पन्नास हजार रुपये वाचले

खासगी रुग्णालयात एचआर-सीटी तपासणीचे अडीच ते तीन हजार रुपये घेतात. कोरोनाची दुसरी लाट आल्यानंतर एचआर-सीटी तपासणी करण्यासाठी खासगी रुग्णालयांमध्ये गर्दी व्हायला लागली होती. ही गर्दी पाहून नाशिक महापालिकेने अंदाजे तीन कोटी रुपयांचे १६० स्लाइडचे मशिन बसण्याचा निर्धार केला. २ मेपासून हे मशिन कार्यरत आहे. आजपर्यंत तीन महिन्यांमध्ये तब्बल एक हजार चारशे लोकांची एचआर-सीटी तपासणी झाली असून, बिटको रुग्णालयात एचआर-सीटी तपासणी करायची असल्यास इनडोअर रुग्णांना हजार रुपये व आउटडोअर रुग्णांना दीड हजार रुपये लागतात. खासगी ठिकाणी हीच तपासणी अडीच ते तीन हजार रुपयांमध्ये होत आहे. त्यामुळे अनेक रुग्ण बिटको हॉस्पिटलमध्ये ही तपासणी करीत आहेत. त्यामुळे नाशिक शहरातील अनेक रुग्णांचे पैसे वाचले आहेत. यासाठी डॉ. प्रीती आहेर, डॉ. संतोष बोरसे हे रेडिओलॉजिस्ट तन-मन-धनाने काम करीत आहेत. संदीप शेवाळे, स्वप्नील बोराडे, कृष्णा अहिरे, अरबाज शेख, कृष्णा डुकरे, दिलीप गोरे, भारत गायकवाड हे टेक्निशियन हिरिरीने काम करीत आहेत. खासगी हॉस्पिटललाही या सुविधेचा फटका बसला असून, त्यांनीही दर नियंत्रणात आणण्याचे ठरविले आहे.