सारडा सर्कल परिसरात विजेच्या खांबास आग

जुने नाशिक : सारडा सर्कल परिसरातील विजेच्या खांबास (Electric pole) गुरुवारी (ता. २३) रात्री सव्वाआठच्या सुमारास अचानक आग लागली. आगीच्या ठिणग्या खाली पडत होत्या. परिसरात एकमेकास लागून अनेक गॅरेज अन्य व्यावसायिकांची दुकाने असल्याने भीतीचे वातावरण निर्माण झाले होते.

परिसरातील मोहसीन खान, आबिद खान, मुझफ्फर खान यांनी परिस्थितीचे गांभीर्य लक्षात घेता वीज वितरण विभागास तसेच अग्निशामक विभागास माहिती दिली. वीज वितरण विभागाच्या कर्मचाऱ्यांनी परिसरातील वीजपुरवठा खंडित करून आगीवर नियंत्रण मिळवले. अग्निशामक विभागाचे कर्मचारीदेखील घटनास्थळी दाखल झाले. आग विझल्याने ते माघारी फिरले. वेळीच वीजपुरवठा खंडित केला नसता, तर मोठी दुर्घटना घडली असती. कर्मचारी रात्री उशिरापर्यंत काम करत असल्याने परिसरात बराच वेळ वीजपुरवठा (Power supply cut off) खंडित होता.