थकीत कर वाहनांचा 14 सप्टेंबरला जाहीर लिलाव

नाशिक : मोटार वाहन कर न भरलेल्या व मोटार वाहन कायद्यातील विविध गुन्ह्यात जप्त केलेल्या १२८ तीन चाकी वाहनांचा १४ सप्टेंबरला सकाळी अकराला जाहीर ई-लिलाव करण्यात येणार असल्याची माहिती उपप्रादेशिक परिवहन अधिकारी प्रदिप शिंदे यांनी दिली. या ई- लिलावात सहभाग घेण्यासाठी इच्छुकांनी ९ सप्टेंबरपर्यंत नोंदणी करावी, असे आवाहन विभागाकडून करण्यात आले आहे. (Public auction of overdue tax vehicle on September 14 nashik Latest Marathi News)

जाहीर ई- लिलावात सहभाग घेण्यासाठी इच्छुक नागरिकांनी www.eauction.gov.in या संकेतस्थळावर नोंदणी करावी. प्रादेशिक परिवहन कार्यालय, नाशिक येथे २५ हजार रुपये रक्कमेचा आरटीओ नाशिक या नावाने अनामत धनाकर्ष (डिमांड ड्राफ्ट) व २ हजार रुपये लिलाव शुल्कासह नाव नोंदणी करून कागदपत्रांची पूर्तता करणे आवश्यक आहे.

लिलाव करण्यात येणारी वाहने राज्य परिवहन महामंडळ कार्यशाळा, पेठ रोड, नाशिक येथे पाहणी करण्यासाठी उपलब्ध करून देण्यात आली असून या लिलाव प्रक्रियेत जीएसटी धारकांनाच सहभाग घेता येणार आहे.