Crime News: ताहाराबादजवळ जनावरांची सुटका; साडेबारा लाखांचा मुद्देमाल जप्त

जायखेडा (जि. नाशिक) : कत्तलीच्या उद्देशाने दोन वाहनांतून वाहतूक करीत असताना २५ गाई व ५ गोऱ्ह्यांची जायखेडा पोलिसांनी सुटका केली. या कारवाईत आयशर व पिकअपसह अंदाजे १२ लाख ५० हजार रुपयांचा मुद्देमाल जप्त करण्यात आला असून, एकास अटक केली आहे. एकाच रात्री दोन वेगवेगळ्या ठिकाणी जायखेडा पोलिसांनी कारवाई केली. (Rescue of cattles near Taharabad Assets worth twelve half lakh seized Nashik Latest Crime News)

कत्तलीच्या उद्देशाने जनावरांना अमानुषपणे कोंबून घेऊन जात असल्याची माहिती पोलिसांना मिळाली. त्या आधारे जायखेड्याचे सहाय्यक पोलिस निरीक्षक श्रीकृष्ण पारधी व त्यांच्या पथकाने सापळा लावला. ताहाराबाद रस्त्यावर अवधूत पेट्रोल पंपाजवळ आयशर (क्र. एमएच- १८- एए- ०८४८) ताब्यात घेण्यात आली. तर दुसरी गाडी नामपूर- चिराई रस्त्यावर पिकअप (क्र. एमएच- ०४- डीके- ४६१८) बुधवारी (ता. १२) पहाटे दोनच्या सुमारास पकडण्यात आली.

या वेळी जायखेडा पोलिसांनी २५ गाई, ५ गोऱ्हे व आयशर, पिकअपसह अंदाजे १२ लाख ५० हजार रुपयांचा मुद्देमाल जप्त केला. ट्रकचालक एकलाख अजीज शेख (वय ४५, रा. नेहरूनगर, नवापूर) याला अटक केली आहे. ताब्यात घेण्यात आलेल्या जखमी गुरांवर खासगी पशुवैद्यकीय अधिकारी नवलसिंग खैरनार यांनी उपचार करून त्यांना गोशाळेत पाठविले. याप्रकरणी गुन्हा दाखल करण्यात आला आहे. सहाय्यक पोलिस निरीक्षक श्रीकृष्ण पारधी यांच्या मार्गदर्शनाखाली पोलिस उपनिरीक्षक नवनाथ रसाळ, पोलिस हवालदार सुनील पाटील, जितू पवार यांनी कारवाई केली.