मला ज्यांनी मोठे केले, ते माझ्याबरोबरच : Shiv Sena पक्षप्रमुख उद्धव ठाकरे

नाशिक : शिवसेनेने आतापर्यंत ज्या लोकांना मोठे केले त्यांनी पक्षाशी गद्दारी करत सोडचिठ्ठी दिली. मात्र, ज्या शिवसैनिकांनी मला व शिवसेनेला मोठे केले ते अजूनही माझ्यासोबत आहे. याचा मला अभिमान असून, हीच माझी ताकद आहे व हीच ताकद भविष्यात गद्दारांना नेस्तनाबूत करेल, असे भावनिक उद्गार शिवसेनेचे पक्ष प्रमुख उद्धव ठाकरे यांनी काढले. (Shiv Sena chief Uddhav Thackeray Statement About shiv sainik Nashik Latest Political News)

एकनाथ शिंदे यांच्या नेतृत्वाखाली चाळीसहून अधिक आमदारांनी शिवसेनेला सोडचिठ्ठी देत स्वतःचा गट स्थापन केला. भाजपसोबत सत्ता स्थापन केल्यानंतर आता संघटनात्मक पातळीवर शिवसेनेला नामोहरम करण्याचे प्रयत्न सुरू आहे. नाशिक शहरात एका माजी नगरसेवकाने शिवसेनेला सोडचिठ्ठी देत शिंदे गटात सहभागी झाल्यानंतर शिवसेनेत मोठी फूट पडेल, असे वातावरण निर्माण केले गेले.

त्या पार्श्वभूमीवर संघटनात्मक दृष्ट्या शिवसेनेला बळकटे आणण्यासाठी शिवसेनेचे नेते मैदानात उतरले आहेत. पक्षप्रमुख उद्धव ठाकरे व शिवसेनेची निष्ठा दाखवण्यासाठी शुक्रवारी (ता. २३) मातोश्री निवासस्थानी माजी आमदार व प्रमुख पदाधिकाऱ्यांनी पक्षप्रमुखांची भेट घेतली. शिवसेनेचे एकजूट पाहून उद्धव ठाकरे भारावून गेले यावेळी बोलताना ते म्हणाले, शिवसेनेने ज्या लोकांना मोठे केले त्यांनी स्वार्थासाठी पक्षाशी गद्दारी केली मात्र सर्वसामान्य शिवसैनिक आजही माझ्या सोबत आहे.

जोपर्यंत सर्वसामान्य शिवसैनिक माझ्यासोबत आहे तोपर्यंत शिवसेना संपू शकत नाही. सध्या परिस्थिती वाईट आहे तोडफोड करणे हे भारतीय जनता पक्षाचे उद्दिष्ट आहे या परिस्थितीत शिवसैनिकांनी एकजूट दाखवावे जे गद्दार सोडून गेले त्यांचा विचार न करता सर्व सामान्यांच्या प्रश्नांवर रस्त्यावर उतरण्याचे आवाहन श्री. ठाकरे यांनी केले.

चुंबळे, साबळे गैरहजर

शिवसेनेचे जिल्हा संपर्कप्रमुख भाऊसाहेब चौधरी, उपनेते सुनील बागूल, जिल्हाप्रमुख विजय करंजकर, महानगरप्रमुख सुधाकर बडगुजर, माजी जिल्हाप्रमुख दत्ता गायकवाड, माजी विरोधी पक्षनेते अजय बोरस्ते, माजी गटनेते विलास शिंदे यांच्यासह माजी नगरसेवक उपस्थित होते. मात्र, सिडको विभागातील श्यामकुमार साबळे व शिवाजी चुंबळे गैरहजर राहिले. साबळे हे खनिज मंत्री दादा भुसे यांच्या जवळचे असल्याने त्यांची भूमिका गृहीत धरली जात आहे, तर चुंबळे हे भाजपमध्ये प्रवेश करणार असल्याची चर्चा आहे.