"बाळासाहेबांनी आणि आजीने शिकवलंय की कुणाचं वाईट..." - आदित्य ठाकरे

मनमाड : शिवसेनेची शिवसंवाद यात्रा सुरू असून आदित्य ठाकरे यांनी आज मनमाडमध्ये मेळावा घेतला आहे. बंडखोर आमदारांच्या मतदारसंघात जाऊन सभा घेत सडेतोड उत्तर देण्यासाठी ही यात्रा सुरू केली आहे. बंडखोरांनी गद्दारी का केली हे कळलं नाही असं म्हणत त्यांनी मनमाडमध्ये बंडखोर आमदार सुहास कांदे यांच्यावर निशाणा साधला आहे.

(Aditya Thackeray On MLA)

"मी आज त्यांच्यावर आरोप करायला आलोच नाही कारण उद्धव साहेब आणि बाळासाहेबांनी हेच शिकवलंय की, आदित्य चांगलं काम करत रहायचं, कुणाचं वाईट चिंतायचं नाही आणि हीच आपली शिवसेना आहे. पण सध्याचे सरकार हे तात्पुरतं आहे, तुम्ही लिहून घ्या की हे सरकार कोसळणारंच." असं टीकास्त्र आदित्य ठाकरेंनी सोडलं आहे.

"बंडखोरी केलेल्या या ४० लोकांच्या चेहऱ्यावर मला कधीच आनंद दिसला नाही. ते कधीच नजरेला नजर भिडू शकले नाहीत पण माझ्या चेहऱ्यावर आज जो आनंद आहे तोच त्यावेळीही होता कारण मी त्यांच्यासारखा विकलो गेलो नाही." असा टोला त्यांनी लावला आहे. "बंडखोरी सोडा, लोकांची सेवा करत राहा, काम करत राहा लोकं तुम्हाला डोक्यावर घेऊन नाचतील. पण तुम्ही लोकांना खोटं बोलत राहिलात, फसवत राहिलात तर तुम्हाला लोकं गाडून टाकतील कारण ही लोकशाही आहे." असं आदित्य ठाकरे म्हणाले आहेत.

शिवसेनेनी त्यांना काय कमी केलं होतं? त्यांना जे पाहिजे होतं ते दिलं, त्यांना निधी दिला मग आमचं काय चुकलं? असा सवाल ठाकरेंनी केला आहे. "या ठिकाणी मी जाहीर माफी मागून सांगतो की, आमचं एक चुकलं की, आम्ही राजकारण केलं नाही, आमच्या आमदारांवर लक्ष ठेवलं नाही हे आमचं चुकलं. आम्ही राजकारण सोडून लोकांची सेवा करत आलो आणि त्यांनी अशी गद्दारी केली." अशी खंत आदित्य ठाकरेंनी व्यक्त केली.

"उद्धवसाहेबांच्या सर्जरीवेळी मला स्कॉटलंडला जायचं होतं तरी, त्यावेळी त्यांनी सांगितलं की माझा विचार करू नको, तुला महाराष्ट्राचं नाव पुढे न्यायचं आहे." असं आदित्य ठाकरे म्हणाले आहेत. त्याचबरोबर बंडखोर आमदार सुहास कांदे हे ठाकरे यांना मनमाड येथे भेटणार होते पण त्यांनी भेटण्यासाठी मातोश्रीवर यावं असा सल्ला आदित्य ठाकरेंनी दिला आहे.