Bus Accident : 'त्या' शिवशाहीच्या चालकाने मद्यपान केल्याचे उघड

सिन्नर (जि. नाशिक) : नाशिकहून पुण्याकडे जाणाऱ्या राज्य परिवहन महामंडळाच्या शिवशाही बसला मंगळवारी (ता.२५) सकाळी अकराच्या सुमारास सिन्नरजवळ अपघात झाला. चालकाचे नियंत्रण सुटून बस रस्त्याच्या मधोमध असलेल्या दुभाजकावर धडकून हा अपघात झाला. दरम्यान चालक मद्यपान करून बस चालवत असल्याचे पोलिसांनी सांगितले. (Shivshahi Bus Accident at nashik pune highway driver for Shivshahi apparently drunk Nashik News)

गुरेवाडी शिवारात हा अपघात झाला. नाशिकहून पुण्याला जाणारी शिवशाही बस ( एम.एच. १४ जी.डी. ८४४१) थेट दुभाजकावर चढली. या अपघातानंतर बसमधील चार ते पाच प्रवासी किरकोळ जखमी झाले. ते इतर वाहनांनी निघून गेल्याचे सांगण्यात आले. अपघातानंतर एमआयडीसी पोलिसांनी धाव घेतली. बसचालक राजू काशिनाथ पवार (३६, रा. कन्नड, जि. औरंगाबाद) याची वैद्यकीय तपासणी केली असता त्याने मद्यप्राशन केल्याचे स्पष्ट झाले अशी माहिती एमआयडीसी पोलिसांनी दिली. याप्रकरणी संशयित पवार याच्याविरोधात एमआयडीसी पोलिस ठाण्यात गुन्हा दाखल केला आहे. हवालदार टेमनर तपास करीत आहे.