तुळजापूर ते सप्तशृंगीगड बससेवा आजपासून

वणी (नाशिक) : साडेतीन शक्तिपीठांपैकी प्रमुख शक्तिपीठ असलेले तुळजापूर ते अर्धे व स्वयंभू शक्तिपीठ असलेले सप्तशृंगीगड या दोन शक्तिपीठांना जोडणाऱ्या राज्य परिवहन महामंडळाच्या बससेवेस सोमवार (ता. २७)पासून प्रारंभ होत आहे. या बससेवेने तुळजाभवानी, तर सप्तशृंगी मातेचे दर्शन भाविकांना सुलभ होणार आहे. (State Transport Corporations bus service connecting Tuljapur to Saptashringigad is starting from today in nashik)

अनेक दिवसांची भाविकांबरोबरच सप्तश्रृंगी निवासिनी देवी ट्रस्ट, सप्तशृंगगड ग्रामस्थ, तसेच पाथरुड येथील ग्रामस्थांच्या मागणीची राज्य परिवहन महामंडळाने दखल घेत तुळजापूर ते सप्तशृंगगड बस सेवेस सोमवारपासून प्रारंभ होत आहे.

तुळजापुर येथून सायंकाळी आठला बस सप्तशृंगीगड (वणी) कडे मार्गस्थ होऊन त्यानंतर उस्मानाबादला रात्री ८.२५ ला, भूम येथे रात्री दहाला, पाथरूड येथे रात्री १०.२०, जामखेड येथे रात्री साडेअकराला, आष्टी येथे रात्री बाराला, अहमदनगरला मध्यरात्री पाऊणला, शिर्डी येथे पहाटे साडेतीनला, सिन्नर पहाटे साडेपाच, नाशिकला सकाळी सव्वासहाला, सप्तशृंगीगडावर सकाळी आठला, असा १२ तासांचा प्रवास करून पोचेल.

तसेच सप्तशृंगीगडावरुन रात्री सव्वाआठला बस निघून नाशिकला दहाला, सिन्नरला पावणेअकराला, शिर्डी रात्री पावणेदोनला, अहमदनगरला पहाटे अडीचला, आष्टी पहाटे सव्वाचारला, जामखेडला पावणेपाचला, पाथरूड येथे साडेपाचला, भूम येथे सव्वासहाला, उस्मानाबादला सकाळी ७.५० ला व शेवटी तुळजापूर येथे सकाळी सव्वाआठला पोचेल. या बससेवेचा श्रीक्षेत्र तुळजापूर व श्रीक्षेत्र सप्तश्रृंगीगड या मार्गावरील सर्व भाविक भक्तांनी लाभ घ्यावा, असे आवाहन सप्तशृंगीगड, तुळजापूर येथील ट्रस्ट, ग्रामपंचायत, ग्रामस्थ यांनी केले आहे.