नाशिक : वाळूचा 72 लाखांचा साठा जप्त

येवला (जि. नाशिक) : ग्रामीण पोलिस पथकाने सिन्नर एमआयडीसी (Sinnar MIDC) व येवला तालुका पोलिस ठाण्याच्या हद्दीत वाळूची अवैध तस्करी (Sand Illegal Smuggling) करणाऱ्या वाहनांवर छापे टाकून कारवाई केली. त्यात चार हायवा ट्रक, अवैध वाळूचा ७२ लाख २६ हजारांचा साठा जप्त केला आहे. (Stocks of sand worth Rs 72 lakh seized Nashik crime News)

पोलिस अधीक्षक सचिन पाटील यांच्या सूचनेप्रमाणे ही कारवाई झाली. श्री. पाटील यांना सिन्नर व येवला परिसरात अवैध वाळूची वाहतूक होत असल्याबाबत माहिती मिळाली. त्यावरून पोलिस पथकाने सिन्नर एमआयडीसी पोलिस ठाण्याच्या हद्दीत पंचाळे गावच्वया शिवारात पंचाळे ते सिन्नर रोडवर अवैध वाळूने भरून जाणारे ट्रकवर छापा टाकला. छाप्यात वाळूने भरलेला ट्रक (एमएच १५, एफव्ही ५३८५) वरील चालक गणेश शिवाजी नवले (रा. कोळपेवाडी, ता.कोपरगाव) यास ताब्यात घेऊन त्याच्याकडून ५५ हजार ३९० अवैध वाळू, ट्रक असा १५ लाख ५५ हजार रुपयांचा मुद्देमाल हस्तगत केला. चालक व मालक तसेच वाळू तस्करी करणाऱ्या मालकांविरुद्ध अवैध गौणखनिज वाहतूक व साठवणुक केल्याप्रकरणी कारवाई करण्यात येत आहे.

येवला तालुका पोलिस ठाण्याच्या हद्दीत भरवस फाटा ते कोळपेवाडी जाणाऱ्या रस्त्यावर अवैधरित्या गौणखनिजाची वाहतूक होत असल्याची माहिती पोलिस विश्वनाथ काकड व पाठक यांना दिली. त्यावरून पोलिस पथकाने भरवस फाटा परिसरात अवैध वाळूची वाहतूक करणारे तीन हायवा ट्रक चालकांवर कारवाई केली. छाप्यांमध्ये हायवा ट्रक (एमएच १५, एजी १९५७, एमएच १६, एसी ९९३४) व (एमएच १७, बीजेड ६५५५)

या वाहनांवरील चालक विलास नागरे (रा. विंचूर, ता. निफाड), देविदास निवृत्ती कानडे (रा. लौकी शिरसगाव, ता. येवला) व ज्ञानेश्वर बुरूंगुले (रा. मीरगाव वावी, ता. सिन्नर) हे कोणताही अधिकृत परवाना नसताना शासनाची फसवणूक करण्याच्या उद्देशाने अवैध वाळू चोरून घेऊन जात असताना, मिळून आले. ट्रक चालक व मालक तसेच गौणखनिज वाळूची तस्करी करणाऱ्या मालकांविरुद्ध भादंवि कलम ३७९, ४२०, ४६५,४६७, ४६८, ४७१, ३४ सह महाराष्ट्र जमीन महसूल संहिता १९६६ चे कलम ४८/७ प्रमाणे कारवाई करण्यात आली.