नाशिकमध्ये वीकेंड लॉकडाउनची कडक अंमलबजावणी

नाशिक : तिसरी लाट आणि डेल्टा प्लसच्या धसक्यामुळे शासनाने लॉकडाउन निर्बंधाची कडक अंमलबजावणी करण्याच्या सूचना दिल्याने दोन दिवसांपासून शहर-जिल्ह्यात कडक अंमलबजावणी सुरू झाली आहे. (Strict implementation of weekend lockdown restrictions in Nashik)

शनिवार व रविवार वीकेंड लॉकडाउन असला तरी दोन आठवड्यांपासून वीकेंड लॉकडाउनमधील निर्बंधांबाबत लोकांकडून काळजी घेतली जात नसल्याचे चित्र होते. मात्र शुक्रवारपासून राज्य शासनाने राज्यभर कडक निर्बंधाच्या अंमलबजावणीचे आदेश दिले. सलग दोनदा लॉकडाउनचे उल्लंघन केल्यास थेट संबंधित दुकान आस्थापना कोरोना साथरोग संपेपर्यंत बंद करण्याच्या सूचना दिल्या आहेत. त्यावर पोलिसांना लक्ष ठेवण्याचे निर्देश असल्याने दोन दिवसांपासून वीकेंड लॉकडाउनमध्ये कडक अंमलबजावणी दिसू लागली आहे. शहर-जिल्ह्यात आज (रविवार) वीकेंड लॉकडाउनचा कडक अंमल दिसला. शहरात सकाळपासून प्रमुख मार्गावर वाहतूक पोलिसांचा राबता होता.

पिकनिक स्पॉटवर लक्ष

बॅरिकेडिंग नसली तरी वाहनांवर पोलिस लक्ष ठेवून होते. त्र्यंबकेश्वर मार्गावर पहिणे व इतर प्रेक्षणीय स्थळांवर गर्दी होत असल्याने पोलिसांनी गड-किल्ल्यांकडे जाणारे रस्ते, प्रेक्षणीय स्थळ पर्यटन केंद्र म्हणून गर्दी होणाऱ्या ठिकाणांवर सकाळपासून लक्ष केंद्रित केले होते. शहरातून येणाऱ्या वाहनांची तपासणी केली जात होती. वीकेंड डेस्टिनेशनसाठी प्रसिद्ध असलेल्या विविध स्थळांकडे जाणाऱ्या मार्गावर पोलिस पाळत ठेवून होते. वाहनांची चौकशी सुरू होती. त्यामुळे पोलिसांचा ससेमिरा चुकवित पर्यटन स्थळ गाठताना अनेकांना माघारी येण्याची वेळ आली.

(Strict implementation of weekend lockdown restrictions in Nashik)