Crime Alert | इंदूरमधील 'त्या' संशयितास अटक

नाशिक रोड : मध्य प्रदेशातील इंदूर (Indore) येथून खून करून फरार झालेल्या संशयितास उपनगर पोलिसांनी जेलरोड येथील नारायण बापूनगर येथे शिताफीने सापळा रचून अटक केली. संशयिताला अटक केल्यानंतर मध्य प्रदेश (Madhya Pradesh) पोलिसांच्या स्वाधीन करण्यात आले आहे. संशयित नारायण बापूनगरमध्ये येणार असल्याची माहिती हवालदार सुदर्शन बोडके यांना समजली. त्यांनी सदर माहिती वरिष्ठ निरीक्षक नीलेश माईनकर यांना दिली. उपनिरीक्षक लोंढे यांच्या मार्गदर्शनाखाली बोडके, सहाय्यक उपनिरीक्षक गोडसे, ताजणे, शेख, मढवई व इतरांनी सापळा (Trap) रचला.

यादरम्यान, एक जण रस्त्याच्या कडेला असलेल्या आडोशाने पुढे येत होता. चौकशी सुरू केली असता, पोलिसांच्या हाताला झटका देऊन पळून जाण्याचा प्रयत्न करत असतानाच त्याला शिताफीने अटक केली. त्यांचे नाव सिद्धार्थ सुनील सिंग राठोड (२९) असल्याचे सांगितले. यानंतर उपनगर पोलिसांनी इंदूर पोलिसांशी संपर्क साधून माहिती दिली. त्यानंतर इंदूर पोलिसांचे एक पथक आले व संशयिताला घेऊन गेले. उपनगर पोलिसांनी केलेल्या या कामगिरीबद्दल पोलिस आयुक्त दीपक पांडे (CP Deepak Pandey) , उपायुक्त विजय खरात, सहाय्यक आयुक्त सिद्धेश्वर धुमाळ, वरिष्ठ निरीक्षक नीलेश माईनकर आदींनी अभिनंदन केले आहे.