जिल्हाधिकाऱ्यांकडे कुंभमेळा आयुक्तपदाचा पदभार

जिल्हाधिकारी प्रसाद यांच्याकडे कुंभमेळा आयुक्तपदाचा पदभार सकाळ वृत्तसेवा नाशिक, ता. २३ : सिंहस्थ-कुंभमेळा प्राधिकरणाचे आयुक्त शेखर सिंह रजेवर असल्याने त्यांच्या पदाचा तात्पुरता पदभार जिल्हाधिकारी आयुष प्रसाद यांच्याकडे सोपविण्यात आला आहे. कुंभमेळ्याची कामे सुरळीत सुरू राहावीत, यासाठी जिल्हाधिकाऱ्यांकडे सोपविण्यात आल्याचे सांगण्यात येत आहे. नाशिक-त्र्यंबकेश्‍वर सिंहस्थ कुंभमेळ्यास ३१ ऑक्टोबरला ध्वजारोहणाने प्रारंभ होणार आहे. त्यामुळे सध्या सिंहस्थ कुंभमेळ्याच्या अनुषंगाने हाती घेण्यात आलेल्या विकासकामांना गती देण्यात आली आहे. या विकासकामांमध्ये पायाभूत सुविधा, रस्ते, पाणीपुरवठा, स्वच्छता, वाहतूक व्यवस्थापन तसेच भाविकांसाठी आवश्यक असलेल्या सोयी-सुविधांचा समावेश आहे. ही सर्व कामे वेळेत पूर्ण करण्यासाठी कुंभमेळा आयुक्त सिंह हे विविध विभागांमध्ये समन्वयाची महत्त्वाची भूमिका पार पाडत आहेत. सिंह हे काही दिवस सुटीवर गेले आहेत. त्यामुळे त्यांच्या अनुपस्थितीत विकासकामांची गती कायम राखण्यासाठी जिल्हाधिकारी प्रसाद यांच्याकडे आयुक्तपदाचा तात्पुरता पदभार सोपविण्यात आला आहे.