तहानलेल्या बैलांची पाण्याकडं धाव...सोबत 'तो' ही ओढला गेला...अन् काही क्षणातच

नाशिक : डोंगराळे (ता. मालेगाव) तलावात बैलांना पाणी पाजण्यासाठी गेलेल्या सातवीतील विद्यार्थी ओम दिलीप अहिरे (वय 13) याचा बुडून मृत्यू झाल्याची घटना घडली. हा प्रकार शनिवारी (ता. 18) दुपारी घडला. 

अशी आहे घटना

ओम येथील केबीएच विद्यालयात शिकत होता. लॉकडाउनमुळे शाळा बंद असल्याने ओम आपल्या मूळगावी डोंगराळे येथे आई-वडिलांकडे राहण्यासाठी गेला होता. शनिवारी दुपारी तो गावाजवळील तलावावर बैलांना पाणी पाजण्यासाठी घेऊन गेला. त्याच्यासमवेत नववीत शिकणारा मोठा भाऊ होता. तलावाजवळ जाताच पाणी पाहून बैलांनी पाण्याकडे धाव घेतली. काही क्षणातच ओम बैलांसोबत खोल पाण्यात ओढला गेला व तलावातील पाण्यात बुडाल्याने त्यांचा अंत झाला. अतिशय गरीब कुटुंबातील ओम शिक्षणासाठी शहराजवळील द्याने येथे कुटुंबासोबत राहत होता. लॉकडाउन असल्याने डोंगराळे या आपल्या मूळगावी गेला अन्‌ जीव गमावून बसला. विशेष म्हणजे, अहिरे कुटुंबीयांनी गावावरील शेतीकामे करण्यासाठी नातेवाइकांची बैलजोडी मागून आणली होती. आठ दिवसांत शेत नांगरणी करून ते नातेवाइकांची बैलजोडी परत पाठविणार होते. ओमच्या मृत्यूमुळे परिसरात हळहळ व्यक्त होत आहे. याबाबत तालुका पोलिस ठाण्यात आकस्मिक मृत्यूची नोंद झाली आहे.  

हेही वाचा > संतापजनक! कोरोनाबाधित रूग्णाचा अंगावर थुंकण्याचा प्रकार..अँम्ब्युलन्स चालकाला मारहाण

हेही वाचा > GOOD NEWS : कोरोनापासून बचाव करणाऱ्या 'सुरक्षाकवच'ची होतेय नाशिकमध्ये निर्मिती...पाहा हा व्हिडिओ