लहान्याची दारू सोडवण्यासाठी गेलेल्या भावंडाना वाहनाने चिरडले

इगतपुरी (जि. नाशिक) : तालुक्यातील मुरंबी येथील दोन सख्खे भाऊ नाशिकच्या पांडव लेणीजवळ शुक्रवारी (ता. १७) सकाळी अकराच्या सुमारास झालेल्या अपघातात जागीच ठार झाले. लहान भावाची दारू सोडविण्यासाठी जाऊन परतत असताना, अनोळखी वाहनाने चिरडल्याने दोघांचा हृदयद्रावक मृत्यू झाला.

मुरंबी (ता. इगतपुरी) येथील गोरख लक्ष्मण जाधव (वय ३५) लहान भाऊ सोमनाथ जाधव (२५) याची दारू सोडविण्यासाठी शुक्रवारी सकाळी दोघे वणी येथे गेले होते. तिकडून दुचाकी (एमएच १५, डीपी ४२१४)वरून मुरंबीकडे परतत होते. सकाळी अकराच्या सुमारास मुंबई- आग्रा महामार्गावरील पांडव लेणीसमोर उड्डाणपुलावर त्यांच्या दुचाकीला अनोळखी वाहनाने धडक दिली. या अपघातात दोघांना वाहनाने चिरडल्याने ते जागीच ठार झाले. अपघातात मृत झालेल्या दोन्ही भावांमागे आई, वडील, दोघांच्या पत्नी, दोन मुली व बहीण असा परिवार आहे. या प्रकरणी अंबड पोलिस ठाण्यात अज्ञात वाहनचालकाविरोधात गुन्हा दाखल झाला आहे. वरिष्ठ पोलिस निरीक्षक कुमार चौधरी यांच्या मार्गदर्शनाखाली उपनिरीक्षक उत्तम सोनवणे तपास करीत आहेत. दरम्यान, या घटनेमुळे इगतपुरी तालुक्यात हळहळ व्यक्त होत आहे.