Nashik Crime News : शहर परिसरात दुचाकी चोरट्यांचा धुमाकूळ

नाशिक : गेल्या काही दिवसांपासून शहर - परिसरातून दुचाकी लंपास होण्याचे प्रकार अद्यापही थांबलेले नाही. शहराच्या विविध भागातून पुन्हा चार दुचाकी चोरट्यांनी चोरून नेल्या असून, यातील एक दुचाकी तर शहर वाहतूक शाखेच्या पोलिस चौकीतूनच चोरट्यांनी लांबविली आहे. या घटनांमुळे वाहनांच्या सुरक्षेचा प्रश्‍न उभा राहिला आहे. (Two wheeler thefts increased in city Nashik Crime News)

अरविंद त्र्यंबक कराटे (रा. हिरावाडी, पंचवटी) यांच्या फिर्यादीनुसार, ते मंगळवारी (ता. १) गोदाघाटावर गेले होते. दुतोंड्या मारुतीजवळ दुचाकी पार्क केली असता, अज्ञात चोरट्यांनी त्यांची दुचाकी (एमएच- १५- एफए- ६१६९) चोरून नेली. याप्रकरणी पंचवटी पोलिसात गुन्हा दाखल झाला आहे. विपुल धनंजय गांगुर्डे (रा. समृद्धी पार्क, काठेनगर, द्वारका) यांच्या फिर्यादीनुसार, २७ ऑक्टोबरला दुपारी दीडच्या सुमारास त्यांच्या राहत्या इमारतीच्या पार्किंगमधून त्यांची दुचाकी (एमएच- १५- सीजी- १०९६) अज्ञात चोरट्याने चोरून नेली.

तर, गणेश शिवाजी करंजकर (रा. गजानन हाऊस, रासबिहारी लिंक रोड, पंचवटी) यांच्या फिर्यादीनुसार, ३० ऑक्टोबरला त्यांनी मेनरोडवरील विश्राम बाग कॉम्प्लेक्स येथे पार्क केलेली दुचाकी (एमएच- १५- एफएक्स- ४६५२) दुपारी एकच्या सुमारास अज्ञात चोरट्याने चोरून नेली. या दोन्ही घटनेप्रकरणी भद्रकाली पोलीसात गुन्हा दाखल झाला आहे. हेमंत काशिनाथ तुपलोंढे (रा. मखमलाबाद, नाशिक) यांच्या फिर्यादीनुसार, त्यांची दुचाकी (एमएच- १५- सीएन- ७८१२) ३१ ऑक्टोबरला मध्यरात्री पाथर्डी फाटा येथील वाहतूक पोलिस चौकी येथे पार्क केली असता, अज्ञात चोरट्याने चोरून नेली. याप्रकरणी अंबड पोलिसात गुन्हा दाखल करण्यात आला आहे.