Vegetable Rate Hike : आठवडे बाजारात सर्वच भाज्या खाताय भाव; कोथिंबीर, टोमॅटो, आल्याच्या दराने घेतली उसळी

Vegetable Rate Hike : ग्रामीण भागातून कृषी उत्पन्न बाजार समितीतील भाजीपाल्याची आवक गेल्या काही दिवसांपासून थंडावली आहे. त्याचा परिणाम आठवडे बाजारावर झाला असून पालेभाज्यांपासून सर्वच प्रकारच्या भाज्या ‘भाव’ खाऊन गेल्या.

भाजीपाल्याची मंदावलेली आवक व त्यामुळे चढे भाव यामुळे अनेकांनी आठवडे बाजारातील मच्छीला पसंती दिली. (vegetable rate hike in weekly market nashik news)

पावसाच्या रिपरिपीने गत काही दिवसांपासून दिंडोरी रोडवरील कृषी उत्पन्न बाजार समितीसह पेठ रोडवरील शरदचंद्र मार्केटमधील फळभाज्यांची आवक मंदावली आहे. त्यामुळे आठवडे बाजारात टोमॅटो चक्क शंभर ते एकशेवीस रुपये किलो होते.

मेथी, कोथिंबिरीच्या जुडीनेही ‘पन्नाशी’ गाठल्याने गृहिणींचेही बजेटही कोलमडले. याशिवाय वांगी, सिमला मिरची, भेंडी, कारली साठ ते ऐंशी रुपये किलो होते. आल्याची आवक घटल्याने किलोभर आल्यासाठी दोनशे रुपये मोजावे लागत होते.

हेही वाचा : Credit Card फसवणूक....काय घ्याल काळजी?

अनेकांची मच्छीला पसंती

आठवडे बाजारात पालेभाज्यासह सर्वच भाज्यांची आवक घटल्याने विक्रेत्यांची संख्याही तुलनेत कमीच होती. त्यामुळे बाजार गंगाघाट, गणेशवाडीतील काही भाग एवढाच मर्यादित राहिला. भाजीपाल्याने दराने उसळी घेतल्याने अनेकांनी मच्छीला पसंती दिली.

यात वाम, पापलेटसह कोळंबीच्या दराने हजार रुपयांचा दर गाठल्याने अनेकांनी तुलनेत स्वस्त असलेल्या गोड्या पाण्यातील राऊ, कोंबडा, वाडा,कटला, ओले बोंबील यांना पसंती दिली.

सायंकाळी साडेसहाच्या सुमारास पावसाला सुरवात झाली. त्यामुळे अनेक विक्रेत्यांनी कमी केलेल्या दरांत भाजीपाल्याची विक्री करून घरी जाणे पसंत केले. त्यामुळे रात्री उशिरा अनेक गृहिणींनी कमी झालेल्या भावाची पर्वणी साधत भाजीपाल्याची खरेदी केली.