Nashik Crime News : बीट मार्शलच्या सतर्कतेने चोरीतील मुद्देमाल हस्तगत

जुने नाशिक : भद्रकाली पोलिस ठाण्याच्या बीट मार्शलच्या सतर्कतेने अमरावती कोल्हापुरी गेट पोलिस ठाणे हद्दीतील मंदिर आणि घरात झालेली चोरी उघडकीस आणली आहे. संशयितांकडील चोरीच्या दुचाकीच्या डिक्कीतून चोरीचा लाखांचा ऐवज हस्तगत करण्यात आला. (Vigilance of beat marshall seizes stolen goods Nashik Latest Crime News)

संशयित चोरीच्या दुचाकीवरून (एमएच- २९- एयू- ९८९१) पंचवटीच्या दिशेने जात होते. दुचाकी बंद पडल्याने ते कन्नमवार पुलाजवळ थांबले. दरम्यान, महात्मा फुले बीट मार्शल विकी रुमणे आणि उत्तम खरपडे पुलाच्या वरच्या दिशेने येत असताना त्यांनी सायरन वाजविला.

आवाज ऐकून संशयितांनी दुचाकी सोडून पळ काढला. बीट मार्शल दुचाकी घेऊन पोलिस आले. वरिष्ठ निरीक्षक दत्ता पवार यांना याबाबत माहिती दिली. विकी रुमणे, दया सोनवणे आणि उत्तम खरपडे यांनी दुचाकीच्या क्रमांकावरून मालकाचा शोध घेतला. सारंग लाटेकर (रा. विठ्ठलनगर, अकोला रोड अमरावती) यांची दुचाकी असल्याचे निष्पन्न झाले.

त्यांची अधिक चौकशी केली, असता बुधवार (ता. २) त्यांच्या घरातून रोख रक्कम, सोन्याची पोत चोरी झाली होती. तसेच, त्यांची दुचाकीदेखील चोरली होती. तत्पूर्वी त्यांनी गावातील मंदिरातील काही वस्तू आणि दानपेटी फोडून रोख रक्कम चांदीचे कॉइन चोरले होते. त्यासाठी वापरलेल्या दुचाकीचे पेट्रोल संपल्याने श्री. लाठेकर यांच्या घराजवळ सोडली. त्यानंतर त्यांच्या घरात चोरी करून त्यांची दुचाकी पळविली.

याबाबत कोल्हापुरी गेट पोलिस ठाण्यात गुन्हा दाखल असल्याची माहिती उघड झाली. त्यावरून दुचाकीच्या डिक्कीची तपासणी केली असता, रोख रक्कम, चांदीचे कॉइन, निरंजनी सोन्याची पोत, दोन आयफोन, दोन सॅमसंगचे स्मार्टफोन यासह अन्य विविध वस्तू मिळून आल्या.