Jayakwadi Dam: गंगापूर, कडवा, मुकणेचे पाणी आज जायकवाडीला

Jayakwadi Dam : दारणा धरणाचे पाणी जायकवाडीला सोडल्यानंतर आता गंगापूर, कडवा व मुकणे धरणांतून रविवारी (ता. २६) सकाळी पाणी सोडण्यात येणार आहे. पाचशे क्यूसेकने पाण्याचा विसर्ग होणार असल्याचे नाशिक पाटबंधारे विभागाने म्हटले आहे. (Water from Gangapur Kadwa Mukne dam to Jayakwadi today nashik news)

गंगापूर धरण समूहातून एकूण ३.१४३ टीएमसी पाणी सोडायचे आहे. साधारणतः दोन दिवसांत पाणी जाईल, असा अंदाज असल्यामुळे टप्प्याटप्प्याने विसर्ग वाढविण्यात येईल. त्यामुळे नदीपात्रातील वस्तू, साहित्य, मोटारी, वाहने इत्यादी पात्राच्या बाहेर काढून घ्यावे. नदीप्रवाहात कुणीही प्रवेश करू नये. नदीपात्राजवळील धार्मिकस्थळी, तसेच पर्यटनस्थळी नागरिकांनी गर्दी करू नये, असे आवाहन जलसंपदा विभागाने केले आहे.

दरम्यान, दारणा धरणातून शनिवारी (ता. २५) दिवसभर १९२ क्यूसेक वेगाने नदीपात्रात विसर्ग सुरू होता. धरणामधून प्रारंभी १०० क्यूसेक वेगाने नदीपात्रात विसर्ग केल्यानंतर सकाळपर्यंत त्यात ९२ क्यूसेकची वाढ करण्यात आली. पुढील ४८ तासांमध्ये जायकवाडी धरणात हे पाणी पोचण्याची शक्यता आहे. त्यामुळे या पाण्यावर मराडवाड्याची तहान भागणार आहे.

जायकवाडी धरणामध्ये ६५ टीएमसीपेक्षा कमी पाणीसाठा उपलब्ध असल्याने गोदावरी मराठवाडा पाटबंधारे विकास महामंडळाने नाशिक व नगर जिल्ह्यांमधून ८.६०३ टीएमसी पाणी सोडण्याचे आदेश पारित केले होते.

त्यानुसार नाशिक जिल्ह्यातील गंगापूर व दारणा धरण समूहामधून एकूण ३.१४३ टीएमसी पाणी दिले जाणार आहे. पाटबंधारे विभागाने पहिल्या टप्प्यात दारणा समूहातून पाण्याचा विसर्ग सुरू केला आहे. वहन मार्गामध्ये पाणीचोरी रोखण्यासाठी जिल्हा प्रशासनामार्फत डोंगळे तोडण्यात आले. नदीकाठावरील गावांचा वीजपुरवठाही खंडित करण्यात आला आहे.