Winter Temperature in Nashik : नाशिककरांना भरली हुडहुडी; किमान तापमान 13.6

नाशिक : गेल्‍या काही दिवसांपासून वातावरणातील गारवा वाढला असून, नाशिककरांना सायंकाळच्‍या वेळी हुडहुडी भरते आहे. तापमानात घट झालेली असून, शनिवारी (ता.२९) नाशिकचे किमान तापमान १३.६ अंश सेल्‍सीयस नोंदविण्यात आले आहे. कमाल तापमानातही घट होत तीस अंशांपेक्षा कमी होत २९ अंश सेल्‍सीयसची नोंद झालेली आहे. (Winter Temperature in Nashik Minimum temperature 14 degree nashik news)

परतीच्‍या पावसाने जोरदार हजेरी लावल्‍याने नागरिकांची तारांबळ उडालेली होती. परंतु गेल्‍या आठवड्याभरापासून वातावरणात बदल झालेले असून, गारवा वाढल्‍याची अनुभूती येते आहे. दिवसाच्‍या वेळी कडक उन तर सायंकाळनंतर मात्र वातावरणात गारवा जाणवू लागला आहे. यंदाच्‍या हंगामातील निच्चांकी किमान तापमानाची चार दिवसांपूर्वी २५ ऑक्‍टोबरला नोंद झालेली आहे. या दिवशी किमान तापमान १३.४ अंश सेल्‍सीयस नोंदविले गेले होते.

यानंतर सातत्‍याने तापमान कमी राहिले आहे. त्‍यातच शनिवारी (ता.२९) नाशिकचे किमान तापमान १३.६ अंश सेल्‍सीयस नोंदविले आहे. तर कमाल तापमान २९ अंश सेल्‍सीयस नोंदविले आहे. काल (ता.२८) किमान तापमान १५.३ अंश सेल्‍सीयस तर कमाल तापमान २९.८ अंश सेल्‍सीयस नोंदविले आहे. २७ ऑक्‍टोबरला १४ अंशाचे किमान तर २९.७ अंश सेल्‍सीयस इतके कमाल तापमान नोंदविले गेले आहे.

दिवसा कडक उन्‍हाचा अनुभव

सायंकाळनंतर गारवा जाणवत असला तरी दिवसाच्‍या वेळी मात्र तप्त सूर्यकिरणांमुळे कडक उन्‍हाचा अनुभव नागरिकांना येतो आहे. विशेषतः दुपारी बारा ते दोन या वेळेत तप्त उन्‍हामुळे जनजीवन प्रभावित होत असल्‍याचे बघायला मिळत आहे.