Nashik News: पिसाळलेल्या लांडग्याच्या हल्ल्यात महिला जखमी

Nashik News : शेतात काम करत असलेल्या महिलेवर पिसाळलेल्या लांडग्याने हल्ला करून तिच्या हाताला चावा घेतल्याची घटना सिन्नर तालुक्यातील वावी येथे शनिवारी दुपारी बारा वाजेच्या सुमारास घडली. (Woman injured in mauled wolf attack Nashik News)

वावी येथील निंबोणीचा मळा परिसरात राहणाऱ्या मंदाबाई संपत वेलजाळी या दुपारी बारा वाजेच्या सुमारास स्वतःच्या शेतात काम करत होत्या. त्यांच्या आजूबाजूला घरातील इतर माणसे होती.

सौ. वेलजाळी यांच्यापासून काही अंतरावर दबा धरून बसलेल्या लांडग्याने अचानक हल्ला केला. या हल्ल्यात उजव्या हाताला चावा घेत त्यांना रक्तबंबाळ केले. बाजूला काम करणाऱ्या कुटुंबातील सदस्यांनी आरडाओरड केल्यावर लांडग्याने सौ. वेलजाळी यांचा हात सोडला. व मदतीला आलेल्यांवर आक्रमकपणे तो धावून गेला.

मात्र लाठ्या काठ्या बघून त्याने धूम ठोकली. जखमी अवस्थेतील सौ. वेलजाळी यांना गावातील खाजगी दवाखान्यात आणण्यात आले. मात्र जखम मोठी असल्याने व पिसाळलेल्या लांडग्याने चावा घेतलेला असल्याने त्यांना वावी प्राथमिक आरोग्य केंद्रात जाण्याचा सल्ला डॉक्टरांनी दिला.

हेही वाचा : Credit Card फसवणूक....काय घ्याल काळजी?

तेथे प्रथमोपचार केल्यावर शासकीय रुग्णवाहिकेतून नाशिकच्या जिल्हा रुग्णालयात पुढील उपचारासाठी नेण्यात आले. यांच्या हाताला जवळपास 14 टाके घालण्यात आले.

गेल्या चार ते पाच दिवसांपासून पिसाळलेला लांडगा परिसरात फिरत आहे. या लांडग्याने अनेक दुचाकीस्वारांवर देखील हल्ल्याचा प्रयत्न केला. तसेच एक-दोन कुत्र्यांवर हल्ला करून जखमी केले आहे.

हा लांडगा पिसाळलेला असल्याने तो कळपापासून बाजूला पडला आहे. या लांडग्याचा वनविभागाने तातडीने बंदोबस्त करावा अशी मागणी परिसरातील शेतकऱ्यांनी केली आहे.