पौरोहित्‍यातही महिलाराज : गुरूंच्या सान्निध्यात अशक्‍यही शक्य

नाशिक : दीप्ती मुळे यांची ओढ धार्मिकतेकडे होतीच, तसेच त्‍यात अजून भर पडली त्या नाशिकला आल्‍यावर. आपली आवड जोपासावी म्‍हणून त्‍यांनी पौरोहित्‍याच्या वर्गात प्रवेश घेतला. गुरूंच्या सान्निध्यात अशक्‍यही शक्य असल्याचे त्यांनी ‘सकाळ’ शी संवाद साधत आपल्या प्रवासाविषयीचे अनुभव कथन केले. (women rule in priesthood dipti Mulay nashik Latest Marathi news)

दीप्ती मुळे यांचे माहेर हे भुसावळचे. लहानपणापासूनच घरातील वातावरण कुलधर्म कुळाचार, धार्मिक जपवणूक यामुळे त्‍यांचा ओढा धार्मिकतेकडे होता. त्‍यांचे सासर चाळीसगाव येथील आहे. पतीच्या नोकरीनिमित्‍त त्‍या नाशिक गंगापूर रोड येथे स्थित झाल्‍या.

त्‍यांच्या मैत्रिणी राणी भवन येथे पौरोहित्‍य शिकण्यासाठी जात. या‍मुळे त्‍यांनाही कुतूहल निर्माण झाले. त्‍यांनी २००३ मध्ये प्रवेश घेतला. तीन वर्ष वर्गाचे शिक्षण व पुढील वेदोक्‍त शिक्षणासाठी श्रीमती दुगल यांच्या मार्गदर्शनाखाली शिक्षण घेतले.

मंत्राचे अर्थ, उच्चार याचा आपल्यावर तसेच आसपासच्या वातावरणावर, एकूणच जीवनावर सकारात्‍मक परिणाम होतो. माधुरी जोशी, श्रीमती देशपांडे, जयश्री कुलकर्णी यांचे त्यांना मार्गदर्शन मिळाले. नंतर पौरोहित्‍याच्या वर्गासाठी मार्गदर्शन करत गीतेचे वर्गही घेत आहे.

कोरोनाकाळात ऑनलाइन वर्गात दुबई, केनिया येथील महिलांनाही मार्गदर्शन करत आहे. हे सारे शक्‍य झाले ते गुरूंच्या आशीर्वादानेच, त्‍यांच्या निरपेक्ष मार्गदर्शनाने. आध्यात्‍मिक प्रगतीतही महिला पुढे आल्‍या आहेत याचाही आनंद होतो.

तसेच याचा सकारात्मक परिणाम कुटुंबावर तर झालाच तसेच आपण वावरत असलेल्‍या च समाज व पर्यायाने राज्‍यावरही होत असतो. मुलीचे विष्णुसहस्रनाम पठण झाले. त्‍यांच्या पतीकडूनही खूप सहकार्य होते.

यामुळे त्यांचा कल वाढत जाऊन अधिक जोमाने व आवडीने पुढचे शिक्षण घेतले. आषाढी एकादशीला ऑनलाइन गीतेचे पूर्ण अध्याय वाटप करून पाठ करण्यात आला. तसेच स्‍त्रीसुक्‍त, सहस्रनाम यांचे पठण केले. हे सारे गुरुजनांमुळेच शक्‍य झाल्याचे ते सांगतात.