तरुणीचा ताबा सुटल्याने दुचाकी घुसली ATM मध्ये

सिडको (नाशिक) : सावतानगर येथील SBI बँकेच्या एटीएम मध्ये पैसे काढण्यासाठी गेलेल्या तरुणीचा दुचाकीवरील ताबा सुटल्याने दुचाकी थेट एटीएममध्ये घुसली. या अपघातात तरुणीच्या डोक्यास गंभीर दुखापत झाली आहे. सदर घटना ही बाजूलाच असलेल्या एका दुकानाच्या सीसीटीव्हीमध्ये कैद झाली आहे.

गौरी प्रदीप सैंदाणे (१८, रा. खांडे मळा) ही सकाळी ९. ३० च्या सुमारास घरातून निघाली. महालक्ष्मी चौक मंदिरासमोर असलेले एसबीआय बँकेच्या एटीएममध्ये पैसे काढण्यासाठी गेली व पैसे काढून बाहेर आल्यानंतर तीने दुचाकी सुरू केली. तिचा दुचाकीवरचा ताबा सुटल्याने तिच्याकडून गाडी समोरच असलेल्या एसबीआयच्या एटीएममध्ये घुसली. या अपघातामध्ये तिच्या डोक्याला गंभीर दुखापत झाली आहे.घटनेची माहिती कळताच अंबड पोलिस स्टेशनचे कर्मचारी तेथे दाखल झाले. तसेच, पोलिसांनी ही माहिती एसबीआय बँकेला कळविल्याने बँकेचे कर्मचारीदेखील या ठिकाणी दाखल झाले. तेथूनच जाणारे एक ज्येष्ठ नागरिक थोडक्यात वाचल्याचे प्रतक्षदर्शींनी सांगितले.