नाशिक : अज्ञात टोळक्याने केली युवकाची गळा चिरून हत्त्या

नाशिक : अंबड शिवारातील संजीव नगरमध्ये मंगळवारी रात्री चार-पाच जणांच्या टोळक्याने एका युवकावर हल्ला करीत त्याचा गळा चिरून हत्त्या केली. घटनेनंतर संशयित पसार झाले तर गंभीर जखमी युवक बराचवेळ जागेवर पडून राहिला. त्यामुळे मोठ्या प्रमाणात रक्तश्राव झाल्याने त्याचा उपचारादरम्यान मृत्यू झाला. दरम्यान अंबड हद्दीत गेल्या दोन महिन्यातील खुनाची हि चौथी घटना आहे, 

सदर आलम शब्बीर शेख (१९, रा. मूळ रा, दरभंगा, बिहार) असे मयत युवकाचे नाव आहे. पोलिसांनी दिलेल्या माहितीनुसार, अंबड लिंक रोडवरील संजीवनगर येथे यात्रा होती. मंगळवारी (ता,५) रात्री ९-१०च्या दरम्यान सदरे आलम याच्यावर चार ते पाच जणांच्या टोळक्याने अचानक हल्ला केला. यावेळी संशयितांपैकी एकाने आलमच्या गळ्यावर तीक्ष्ण हत्याराने वार केला. यात त्याच्या गळ्यावर खोलवर जखम झाल्याने तो जागेवरच कोसळला. तर संशयित पसार झाले. घटनेची माहिती मिळताच अंबड पोलीस घटनास्थळी दाखल झाले. जखमी आलमला तात्काळ जिल्हा रुग्णालयात दाखल केले, त्यानंतर त्यास खासगी रुग्णालयात दाखल केले असता उपचारादरम्यान त्याचा मृत्यू झाला. याप्रकरणी अंबड पोलिसात खुनाचा गुन्हा दाखल करण्यात आला आहे. संशयिताचा पोलीस शोध घेत आहेत.

...तर तो वाचला असता

आलमवर वार झाल्यानंतर तो जागेवर कोसळला. यात त्याचा कंठच कापला गेला होता, रक्ताच्या चिळकांड्या उडत होत्या. पण त्याच्या मदतीसाठी जमावातून कोणी पुढे आले नाही. पोलीस येईपर्यंत बराच वेळ गेल्याने त्याचा रक्तश्रावही बराच झाला. याबाबतचा व्हिडीओ सोशल मीडियावर व्हायरल झाला आहे कंठच कापला गेल्याने तो पोलिसांना काहीही सांगू शकला नाही, त्यामुळे संशयिताविषयी काहीही माहिती पोलिसांना मिळू शकली नाही.