ZP Cleanliness Drive : स्वच्छता मोहिमेनंतर जिल्हा परिषद ओस

ZP Cleanliness Drive : जिल्हा परिषद प्रशासनाकडून मंगळवारी (ता. २) गोदावरी स्वच्छता मोहीम राबविण्यात आली. या मोहिमेत मुख्यालयातील सर्वच अधिकारी, कर्मचारी सहभागी होते.

सकाळी स्वच्छता केल्यानंतर अधिकारी, कर्मचारी यांनी जिल्हा परिषदेत येणे अपेक्षित असताना, स्वच्छता केल्यानंतर अधिकारी, कर्मचारी गायब झाले होते. ठराविक विभागप्रमुख, कर्मचारी वगळता सर्वच अधिकारी, कर्मचारी यांनी जिल्हा परिषदेकडे पाठविल्याने जिल्हा परिषद ओस पडली होती. (zp office staff absent after ZP Cleanliness Drive nashik news)

गोदावरी प्रदूषण मुक्त करण्यासाठी जिल्हा परिषदेची यंत्रणा सरसावली असून, गोदावरी नदीमधील कचरा स्वच्छ करण्यासाठी जिल्हा परिषदेच्या वतीने मंगळवारी विशेष स्वच्छता मोहीम हाती घेतली होती.

नाशिक तालुक्यातील लाखलगाव येथे सकाळच्या सत्रात जिल्हा परिषदेचे सर्व विभागप्रमुख, कर्मचारी यांनी स्वच्छता केल्याचा दावा केला जात आहे. मात्र, ही मोहीम केवळ दिखावा असल्याचे दिसून आले.

येथील नदीपात्रातील पाणवेली काढण्यासाठी जेसीबीचा वापर करण्यात आला. जेसीबीच्या साहाय्याने सर्व पाणवेली हटविण्यात आल्या. दाखल झालेल्या ठराविक अधिकारी वर्गाने पात्रात उतरत, स्वच्छता केली.

हेही वाचा : संतुलित आहारातून रोखा फॅटी लिव्हरचा आजार

मात्र, बहुतांश अधिकारी व कर्मचारी वर्गाने स्वच्छतेपासून दूर राहणे पसंत केल्याची चर्चा कर्मचारी वर्गात होती. सदर स्वच्छता मोहीम संपल्यानंतर ठराविक विभागप्रमुख जिल्हा परिषदेत दाखल झाले अन त्यांनी आपले दैनंदिन कामकाज केले.

मात्र, बहुतांश अधिकारी तसेच कर्मचारी यांनी मोहिमेनंतर जिल्हा परिषदेकडे पाठ फिरविल्याचे दिसून आले. त्यामुळे जिल्हा परिषदेत ठराविक विभागप्रमुख वगळता अनेक विभागप्रमुख गैरहजर होते.

तसेच विभागातील कर्मचारी वर्गाची उपस्थितीही नगण्य होती. अधिकारी, कर्मचारी उपस्थित नसल्याने गर्दी देखील नव्हती. त्यामुळे आठवड्याचा पहिला दिवस असताना देखील जिल्हा परिषदेत सुट्टी आहे की काय असा प्रश्न उपस्थित होत होता.