Dhule News : शहर वाहतूक नियंत्रण पोलिसांनी फिरविला ‘तीन लाखां’वर रोलर

Dhule News : शहरात सार्वजनिक शांततेचा भंग करत फटाके फोडत भरधाव बुलेट चालविणाऱ्यांची संख्या वाढली आहे. अनेक ठिकाणी बुलेटस्वारांच्या उच्छादामुळे सर्वसामान्य नागरिक अक्षरशः वैतागले आहेत. त्यामुळे जिल्हा पोलिस अधीक्षक श्रीकांत धिवरे यांनी अशा बुलेटस्वारांचा आवाज दाबण्यासाठी कठोर पावले उचलली आहेत.

त्यांनी बुधवारी (ता. ७) सकाळी शहरात नाकाबंदी करत तासाभरात तब्बल शंभरहून बुलेटधारकांवर दंडात्मक कारवाई केली. तसेच सर्व बुलेटचे सायलेन्सर काढून त्यांच्यावर संतोषीमाता चौकात रोड रोलर फिरविला. (Punitive action was taken against more than hundred bullet holders Also remove silencer of all bullets and Turned the road roller them dhule news)

पोलिस अधीक्षक आणि शहर वाहतूक नियंत्रण पोलिसांच्या कारवाईचे शहरातील सर्वसामान्य नागरिकांकडून स्वागत होत आहे. गेल्या काही महिन्यांपासून बुलेट वाहनाला कर्कश आवाज करणारे सायलेन्सर बसवून शायनिंग मारणाऱ्यांची संख्या मोठ्या प्रमाणात वाढली होती.

काही बुलेटस्वार कानठळ्या बसविणाऱ्या आवाजाच्या माध्यमातून दहशत निर्माण करण्याचा प्रयत्नही करताना दिसत होते. परिणामी, नागरिकांना नाहक त्रास सहन करावा लागत होता. त्यामुळे अशा फटाके फोडणाऱ्या बुलेटस्वारांवर कारवाईचा आदेश जिल्हा पोलिस अधीक्षक श्रीकांत धिवरे यांनी वाहतूक शाखेला दिला होता.

शिवाय कारवाई करतानाच बुलेटचे सायलेन्सर काढून घेण्याचेही निर्देश दिले होते. जिल्हा पोलिस अधीक्षकांच्या आदेशानुसार शहर वाहतूक शाखेने फटाके फोडणाऱ्या बुलेटधारकांवर कारवाई करण्यासाठी सकाळी साडेदहा ते साडेअकरा या वेळेत शहरातील रहदारीच्या चौकांमध्ये नाकाबंदी केली.

यात संतोषीमाता चौक, जयहिंद महाविद्यालय चौक, बारा पत्थर चौक आदी ठिकाणांचा समावेश होता. तासाभराच्या नाकाबंदीत सुमारे शंभर बुलेटधारकांना पकडण्यात आले. तसेच त्यांच्यावर दंडात्मक कारवाई करतानाच सायलेन्सर काढून घेण्यात आले.

यामुळे बुलेटधारकांचे धाबे चांगलेच दणाणले होते. सर्व शंभर सायलेन्सरवर संतोषीमाता चौकात रोड रोलर फिरविण्यात आला. स्थानिक बाजारात एका सायलेन्सरची किंमत अंदाजे तीनशे रुपये आहे. त्यानुसार एकूण तीन लाख किमतीचे सायलेन्सर नष्ट करण्यात आले.

तसेच बुलेटधारकांवर दंडात्मक कारवाई करण्यात आली. ही कारवाई जिल्हा पोलिस अधीक्षक श्रीकांत धिवरे, अपर पोलिस अधीक्षक किशोर काळे, सहाय्यक पोलिस अधीक्षक हृषीकेश रेड्डी यांच्या मार्गदर्शनात शहर वाहतूक शाखेचे सहाय्यक पोलिस निरीक्षक भूषण कोते, पोलिस उपनिरीक्षक हेमंत सोनार, सुनील इनमुलवार, संदीप ठाकरे व अंमलदारांच्या पथकाने केली.