Dhule Polio Vaccination : बालकांना ३ मार्चला देणार पोलिओ लस : जिल्हाधिकारी गोयल

Dhule News : जिल्ह्यात ग्रामीण व शहरी भागात एकूण एक लाख ८८ हजार ४७० बालकांना रविवारी ३ मार्चला पोलिओ लस देण्यात येणार आहे. या मोहिमेंतर्गत एकही बालक वंचित राहू नये यासाठी पोलिओ लसीकरणाचे सूक्ष्म नियोजन करण्यात यावे, अशी सूचना जिल्हाधिकारी अभिनव गोयल यांनी यंत्रणेला दिली.

जिल्हाधिकारी कार्यालयातील नियोजन सभागृहात जिल्हा कार्यबल समितीची बुधवारी (ता. ७) बैठक झाली. (Collector Goyal statement Polio vaccine will be given to children on March 3 dhule news)

श्री. गोयल, जिल्हा परिषदेचे मुख्य कार्यकारी अधिकारी शुभम गुप्ता, जिल्हा शल्यचिकित्सक डॉ. दत्ता देगावकर, उपमुख्य कार्यकारी अधिकारी हेमंत भदाणे, जिल्हा परिषदेचे जिल्हा आरोग्याधिकारी डॉ. सचिन बोडके.

जिल्हा क्षयरोग अधिकारी डॉ. सोनिया बागडे, जिल्हा माताबाल संगोपन अधिकारी डॉ. तरन्नुम पटेल, साथरोग वैद्यकीय अधिकारी डॉ. एस. बी. मोरे, जिल्हा हिवताप अधिकारी अ. रा. पाटील, महापालिकेचे आरोग्याधिकारी डॉ. एम. आर. शेख यांच्यासह आरोग्य विभागाचे अधिकारी उपस्थित होते.

जिल्हाधिकारी गोयल यांनी सांगितले, की केंद्र सरकारने पोलिओ निर्मूलनासाठी विशेष मोहीम हाती घेतली आहे. त्यानुसार जिल्ह्यातील निर्धारित बालकांच्या लसीकरणासाठी जिल्ह्यात एकूण एक हजार ६३७ पोलिओ बूथ असतील.

यात ९५ मोबाईल टीम शहरी व ग्रामीण भागात काम करणार आहेत. तसेच बसस्थानके, रेल्वेस्थानक, टोलनाके, जेथे प्रवासाच्या दरम्यान ये-जा असते अशा ठिकाणी आवश्यकतेनुसार ट्रांजिस्ट टीमचे आयोजन करण्यात आले असून, एकूण ७२ ट्रांजिस्ट टीम काम करणार आहे़त.

या मोहिमेमध्ये पालकांनी घरातील व परिसरातील शून्य ते पाच वयोगटातील बालकांना जवळच्या लसीकरण बूथवर नेऊन पल्स पोलिओ लसीकरण मोहिमेचा लाभ मिळवून द्यावा.

सर्व पालकांनी आठवणीने रविवारी बालकाला पोलिओची लस देऊन जिल्ह्याचे शंभर टक्के उद्दिष्ट पूर्ण करावे, असे आवाहन जिल्हाधिकारी गोयल, सीईओ गुप्ता, जिल्हा शल्कचिकित्सक डॉ. देगावकर, जिल्हा आरोग्याधिकारी डॉ. बोडके यांनी केले.