Nandurbar Crime News : तेरावर्षीय बालकाच्या गळ्याला चाकू लावून मोबाईलची चोरी

Nandurbar Crime News : ‘मोबाईल दे नाहीतर गळा चिरेन’ असे धमकावत एका तेरावर्षीय बालकाच्या हातातून मोबाईल हिसकावून चोरटा फरारी झाला.

मुलाचा जीव वाचला हे महत्त्वाचे, मोबाईल नाही मिळाला तरी चालेल मात्र चोरटा पकडला पाहिजे, अशा तीव्र भावना मुलाच्या पालकांनी व्यक्त केल्या.(Thirteen year old boy mobile was stolen nandurbar crime news)

शहरातील मंगलदास पार्क परिसरातील आस्था हॉस्पिटलमागील बाजूस राहणाऱ्या फिरोज अघाम यांचा तेरावर्षीय मुलगा इबादत फिरोज अघाम मित्रांसोबत रात्री फेरफटका मारण्यासाठी परिसरात फिरत असताना अचानक एका व्यक्तीने त्याच्याजवळून मोबाईल मागितला.

त्याने मोबाईल दिला नाही. त्यानंतर थोड्या वेळाने परत तोच व्यक्ती त्या मुलाजवळ आला आणि म्हणाला, ‘तुझा फोन मला दे. दिला नाहीतर तुझा गळा चिरून टाकेन,’ असे म्हणत त्या व्यक्तीने धारदार चाकू गळ्याला लावून धमकावले.

या वेळी बालक भयभीत झाले व रडायला लागले. त्याने एक लाख ३० हजार रुपयांचा आयफोन त्या व्यक्तीला दिला. जीव वाचवत इबादत अघाम घरी पळाला. ही घटना नुकतीच घडली.

यामुळे शहरात भीतीचे वातावरण निर्माण झाले आहे. नवापूर शहरात चोरट्यांची दहशत कायम असून, पोलिस प्रशासनाने ठोस पाऊल उचलण्याची गरज व्यक्त केली जात आहे.