Dhule News : विनाक्रमांकाच्या वाहनांद्वारे उघडपणे डाका

धुळे रावेर (ता. धुळे)- येथील गट क्रमांक ८० पैकी सरकारी गटात सर्रास होत असलेल्या गौणखनिजाचे अवैध उत्खनन आणि वाहतुकीत विनाक्रमांकाचे वाहन वापरात असल्याचे समोर आले. ही कार्यप्रणाली (मोडस ऑपरेंटी) जिल्ह्यात ठिकठिकाणी होणाऱ्या गौणखनिजाच्या अवैध उत्खनन व वाहतुकीसाठी उजळमाथ्याने वापरली जाते. .महसूल यंत्रणेसह गौणखनिज माफियांच्या संगनमताशिवाय हा घोटाळा शक्य नाही, या निष्कर्षाप्रत जनताही येत आहे. विनाक्रमांकाच्या वाहनांद्वारे सरकारी गौणखनिज क्षेत्रात डाका टाकला जात असताना आणि ते ठाऊक असूनही धुरंधर महसूल यंत्रणा डोळ्यावर पट्टी बांधून कशी? याचा आता शोध घेण्याची वेळ आली आहे..धुळे अपर तहसील कार्यालयाने रावेर येथील गट क्रमांक ८० पैकी सरकारी गटात गौणखनिज उत्खनन व वाहतूक प्रकरणी दीपक खताळ या स्टोनक्रशरधारकास सात कोटी ५४ लाख ३२ हजार ४४३ रुपयांचा दंड ठोठावला. यात संबंधिताने ४ ऑक्टोबर २०२४ ला पोकलॅण्ड मशिनने (क्रमांक ईएक्स २१० एलसी सुपर कॅपिटल अधिक हायड्रोलिक एक्सकॅव्हेटर सिरियल नंबर एसपी २१- ४५०५६) अवैधरीत्या मुरूमाचे उत्खनन आणि विनाक्रमांकाच्या एस. सी. खताळ असे लिहिलेल्या मिनी डंपरने वाहतूक केल्याचा अहवाल तलाठी व मंडळ अधिकाऱ्याने अपर तहसीलदारांना सादर केला. .यंत्रसामग्री कुणाची?या प्रकरणी खताळ यांनी धुळे प्रांताधिकारी रोहन कुवर यांच्याकडे अपिल दाखल केले. त्यांच्यापुढे कामकाज चालले. नोटिशीत ज्या मिनी डंपर, पोकलॅण्ड मशिनचा उल्लेख आहे, ते अपिलार्थी खताळ यांच्या मालकीचे नाही. त्यांच्या नावावर नाही, शिवाय तो डंपर व पोकलॅण्ड ते कार्यान्वित करत नाही. तसेच पोकलॅण्ड व मिनी डंपर हे कोणाच्या मालकीचे आहे, यासंदर्भात कागदपत्रे मिळविण्याचा प्रयत्न अपर तहसील कार्यालयाने केला नाही. ही यंत्रसामग्री जप्तीची, मालकी हक्कासंदर्भातील कारवाई करण्यात आली नाही, असा युक्तिवाद खताळ यांच्यातर्फे करण्यात आला..शहानिशा केली नाहीया पार्श्वभूमीवर प्रांताधिकारी कुवर यांनी त्यांची निरीक्षणे निकालपत्रात नोंदविली. त्यानुसार अपर तहसील कार्यालयाकडून मिनी डंपर व पोकलॅण्ड मशिन कुणाच्या मालकीचे याची शहानिशा करण्यात आलेली नाही. वाहन व यंत्र ताब्यात घेण्यात आलेले नाही. अवैधरीत्या गौणखनिज काढणे व वाहतुकीसाठी वापरण्यात आलेली वाहने ताब्यात घेतल्यास ४८ तासांच्या आत जिल्हाधिकाऱ्यांसमोर किंवा त्यांनी प्राधिकृत केलेल्या उपजिल्हाधिकारी दर्जापेक्षा कमी नसेल अशा अधिकाऱ्यासमोर सादर करण्याबाबत तरतूद आहे. खताळ प्रकरणी अशी कार्यवाही झालेली नाही, असा एक निष्कर्ष प्रांताधिकारी कुवर यांनी सात कोटी ५४ लाखांचा दंड माफ करताना उपयोगात आणला. हा कायदेशीर प्रक्रियेचा एक भाग आहे. त्याविषयी दुमत असण्याचे कुणाचे कारणही नाही..वाहने पळविण्याची घटनामात्र, गौणखनिजाच्या अवैध उत्खनन व वाहतूक प्रकरणी विनाक्रमांकाच्या वाहनांचा वापर होण्याचा प्रकार हा धुरंधर महसूल यंत्रणेसह धुळे जिल्ह्यासाठी काही नवीन नाही. वेळोवेळी महसूल यंत्रणेकडून झालेल्या काही कारवायांवेळी विनाक्रमांकाची वाहने ताब्यात घेऊन संबंधित पोलिस ठाण्यात जमा करण्यात आली. काही वाहने ही तहसील कार्यालय व पोलिस ठाण्याच्या आवारातून पळवून नेण्याच्या घटनाही तितक्याच हिमतीने घडल्या आहेत व घडत आहेत. महसूली अधिकाऱ्यांच्या अंगावर अशी वाहने घालण्याचे प्रकार घडले आहेत..जनतेला जाब द्यावाअसे असताना महसूली जबाबदार अधिकाऱ्यांनी सुमोटो विनाक्रमांकाच्या वाहनांची चौकशी, ती ताब्यात घेणे, त्यासाठी जिल्हा पोलिस प्रशासनाची मदत घेणे आणि माफियांवर कायमस्वरूपी जरब बसविणे, अशा स्वरूपाची ठोस कार्यवाही केली असेल तर ती जनतेपुढे मांडावी, अशी अपेक्षा प्रांताधिकारी कुवर यांच्या निकालपत्रानंतर जनमानसातून व्यक्त होत आहे. एकूणच गौणखनिजाचे अवैध उत्खनन व वाहतूक, यातून शासनाचा अगणित महसूल बुडत असल्याकडे जिल्हा महसूल यंत्रणेचे होणारे दुर्लक्ष माफियांना बळ देणारे आणि महाभाग अधिकाऱ्यांच्या श्रीमंतीस पूरक ठरत असल्याचा निष्कर्ष धुळेकर काढू लागले आहेत. ही स्थिती लक्षात घेता विनाक्रमांक वाहनांद्वारे गौणखनिजावर डाका टाकण्याच्या प्रकाराचा राज्य शासनाने एकदा काय तो सोक्षमोक्ष लावावा, अशी मागणी जिल्ह्यातून होत आहे. .सकाळ+ चे सदस्य व्हा ब्रेक घ्या, डोकं चालवा, कोडे सोडवा!शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.