वडाळी परिसरातील वारकरी पंढरपूरला रवाना

वडाळी : येथील वारकरी आषाढी एकादशीनिमित्त पंढरपूर यात्रेसाठी शुक्रवारी (ता.१७) रवाना झाले. गेल्या दोन वर्षांपासून आषाढी एकादशीची वारी कोरोनामुळे बंद असल्याने आपल्या लाडक्या पांडुरंगाला भेटण्यासाठी वारकरी आतुर आहेत. यावर्षी आषाढी वारी होणार असल्याने वडाळी परिसरातील वारकरी पंढरपूरला मोठ्या उत्साहात रवाना झाले.

वडाळी परिसरात वारकरी संप्रदाय मोठ्या प्रमाणात आहे. त्यामुळे प्रतिवर्षी होणाऱ्या आषाढी वारीला भाविक जात असत, मात्र गेल्या दोन वर्षांपासून कोरोना वाढती रुग्ण संख्या लक्षात घेता शासनाने वारी रद्द केली होती. त्यामुळे वारकऱ्यांना पांडुरंग भेटीला मुकावे लागले होते, मात्र यावर्षीपासून वारी अखंडित सुरु झाल्याने परिसरातील वारकरी विठ्ठलाच्या दर्शनासाठी पंढरपूरकडे रवाना झाले आहेत. ते देहू, आळंदीहून संत तुकाराम महाराजांच्या पालखी सोबत पायी दिंडीत जाणार आहे. तीनशे किलोमीटरचा प्रवास वीस दिवसात करणार आहेत. यात काशिनाथ माळी(कोंढावळ), मोतीलाल माळी(कोंढावळ), भगवान माळी(जयनगर),तर वडाळी येथील शांताराम पाटील, पांडुरंग जगताप, प्रताप धनगर, हिरालाल सोनवणे, लोटन माळी हे यावेळी रवाना झाले आहेत.