Dhule News : विविध हंगामी व्यावसायिकांचे नुकसान; पांझरा नदीतील पाण्याचा फटका; यात्रोत्सवापूर्वी आर्थिक संकट

Dhule News : धुळे, शिंदखेडा आणि अमळनेर तालुक्यातील टंचाई दूर करण्यासाठी पांझरा नदीत सोडण्यात आलेले पाणी व्यावसायिकांसाठी नुकसानकारक ठरले. श्री एकवीरादेवीचा यात्रोत्सव २२ एप्रिलला चैत्र पौर्णिमेपासून सुरू होणार आहे. या पार्श्वभूमीवर हंगामी व्यावसायिक काही दिवसांपासून पांझरा नदीपात्रात दाखल होत आहेत. (water released into Panzara river to alleviate shortage in Dhule Shindkheda and Amalner talukas proved detrimental to businessmen)

त्यांच्याकडून मोठे पाळणे लावण्याचे काम सुरू असतानाच अक्कलपाडा धरणातून सोडण्यात आलेले आवर्तन मंगळवारी (ता. ८) पहाटे धुळ्यापर्यंत पोचले. त्यामुळे व्यावसायिकांचे नुकसान झाले. पांझरा नदीत पाणी येणार याची सूचना नसल्याने मंगळवारी पहाटे व्यावसायिकांनी निवासासाठी उभारलेल्या तात्पुरत्या झोपडीत पाणी शिरले. त्यामुळे त्यांचे साहित्य पाण्याखाली आले.

हंगामी व्यावसायिक उघड्यावर पडले. परिणामी, यात्रा सुरू त्यांना आर्थिक फटका बसला. पांझरा नदीकाठावरील गावांना टंचाईची झळ बसत असल्याने ६ एप्रिलला अक्कलपाडा प्रकल्पातून पाण्याचे पहिले आवर्तन सोडण्यात आले. तीन दिवसांनंतर हे पाणी मंगळवारी पहाटे शहरातील पांझरा नदीत आले.

सुरुवातीला पाण्याचा प्रवाह तसा कमी होता. मात्र, नंतर बऱ्यापैकी पाणी गुडघाभर येण्यास सुरवात झाली. यात्रोत्सवासाठी पाळणे, झोके आणि अन्य साहित्य घेऊन हंगामी व्यावसायिक पांझरा नदीपात्रात दाखल होत आहेत. (latest marathi news)

पाळण्याजवळ व्यावसायिक नासीरभाई पठाण, सिकंदर पठाण (रा. शहादा, जि. नंदुरबार), नवाज पठाण, तनवीर तडवी (रा. शिरपूर) यांनी तात्पुरत्या झोपड्या तयार केल्या होत्या. त्यात नदीपात्रातील पाणी शिरले. तसेच पाळण्याचे साहित्यदेखील पाण्यात बुडाल्याने त्यांचे नुकसान झाले. झोपडीत पहाटेच्या सुमारास पाणी शिरल्याने व्यावसायिकांची धावपळ उडाली.

संसारोपयोगी विविध साहित्य पाण्याबाहेर काढण्यासाठी गोंधळ झाला. झोपडीतील सर्वच आवश्यक साहित्य सुरक्षितस्थळी ठेवण्यासाठी दमछाक झाली. त्यांनी भरून ठेवलेले दहा हजारांचे धान्य पाण्यात ओले झाले. पीठ, मीठ, तेलासह सर्वच वस्तूंचे पाण्यामुळे नुकसान झाले.