Dhule News : बिलाडी येथील तरुण शेतकऱ्याने उचलले टोकाचे पाऊल

Dhule News : बिलाडी (ता. धुळे) येथील शेतकरी मयूर प्रकाश पाटील (वय २३) या तरुण शेतकऱ्याने सततच्या नापिकीमुळे आत्महत्या केली. मयूर नियमितप्रमाणे शेतात गेले होते. मात्र, ते घरी न आल्याने घरच्यांनी तपास सुरू केला. (young farmer from Biladi ended their life dhule news)

नीलेश पाटील, नितीन पाटील, मनोज शिंदे आदी त्यांना शोधत शेतात गेले असता त्यांना तेथे मयूर मृतावस्थेत पडलेले दिसून आले. त्यांनी तत्काळ धुळे येथील रुग्णालयात नेले असता डॉक्टरांनी मयूर यांना तपासून मृत घोषित केले.

शेतात रोगार या कीटकनाशकाची बाटली पडलेली आढळली. मयूर यांनी विषारी रोगार औषध प्राशन करून आपली जीवनयात्रा संपविल्याचे त्यांच्या नातलगांनी सांगितले. घरची परिस्थिती हलाखीची असून, यंदा शेतीतून उत्पन्न येईल या आशेवर असताना तेही आले नाही.

दुसरीकडे शेतीसाठी घेतलेले खासगी व बँकेचे कर्ज कसे फेडायचे, या विवंचनेत मयूर असायचे, त्यातूनच त्यांनी आत्महत्या केल्याचे सांगितले जात आहे. दरम्यान, बिलाडी येथे मंगळवारी (ता. ५) त्यांच्यावर अंत्यसंस्कार करण्यात आले. त्यांच्या मागे वडील प्रकाश हिरामण पाटील, भाऊ प्रमोद पाटील, बहीण राणी पाटील असा परिवार आहे.