धुळे : डंपरखाली चिरडून तरुण ठार; मुलगी जखमी

शिरपूर (जि. धुळे) : भरधाव डंपरखाली (Dumper) चिरडल्याने तरुण ठार (death), तर मुलगी गंभीर जखमी (Injured) झाली. हा अपघात रविवारी (ता. १२) दुपारी साडेचारला वाडी बुद्रुक (ता. शिरपूर) गावाजवळ घडला. मृत व जखमी बापलेक असून, शेवाळे (ता. साक्री) येथील रहिवासी आहेत. नातेवाइकांना भेटण्यासाठी जात असताना, हा अपघात (Accident) झाल्याचे समजते. (Young man killed girl injured in dumper accident Dhule Accident News)

शेवाळी येथील सागर भीमराव कोळी (वय ३२) यांच्या चुलत शालकाचा विवाह १२ जूनला वाल्मीकमगरमध्ये होता. त्यासाठी ते मुलगी दिव्या (वय १४) हिच्यासह दुचाकीने आले होते. लग्न आटोपून दुपारी साडेचारला ते वाडी खुर्द (ता. शिरपूर) येथे नातेवाइकांना भेटण्यासाठी जात होते. वाडी बुद्रुक येथील वळण रस्त्यावर समोरून येणाऱ्या डंपरने त्यांना धडक दिली. त्या वेळी दोघेही रस्त्यावर पडले. डंपरखाली चिरडून सागर कोळी जागीच ठार झाले. दिव्या गंभीर जखमी झाली. तिच्यावर येथील उपजिल्हा रुग्णालयात उपचार करून धुळ्याला हलविले आहे. अपघातानंतर डंपरही उलटला. सागर कोळी खासगी वाहनचालक होते. त्यांच्या मागे आई, वडील, पत्नी, भाऊ, बहीण, मुलगी व मुलगा असा परिवार आहे. शहर पोलिसांत अपघाताची नोंद झाली.