आता देशात चार बायका, 40 मुलं चालणार नाहीत : साक्षी महाराज

Uttar Pradesh Assembly Election 2022 : उन्नावचे भाजप खासदार हरी सच्चिदानंद साक्षी यांनी सरोजिनीनगरमध्ये पक्षाचे उमेदवार राजेश्वर सिंह यांच्यासाठी काल प्रचार केला. ईडीचे माजी अधिकारी राजेश्वर सिंह यांच्या समर्थनार्थ लोधी समाजानं स्वागत समारंभ आयोजित केला होता. या कार्यक्रमाला साक्षी महाराज (Sakshi Maharaj) देखील उपस्थित होते. कार्यक्रमात बोलताना साक्षी महाराज म्हणाले, पंतप्रधान नरेंद्र मोदी (Narendra Modi) हे भारताचे पंतप्रधान असले तरी, ते संपूर्ण जगाचे नेते आहेत. मोदींच्या नेतृत्वाखालील भाजप सरकार (BJP Government) येत्या काळात लोकसंख्या नियंत्रण कायदा करणार आहे. त्यामुळं आता देशात चार बायका, 40 मुलं असं चालणार नाही, असं त्यांनी स्पष्ट केलं.

साक्षी महाराज पुढे म्हणाले, राजेश्वर सिंह (Rajeshwar Singh) यांच्या कुटुंबातील अनेक सदस्य प्रशासकीय सेवेत आहेत. ते स्वत: संचालनालयात सहसंचालक होते. आमदार किंवा मंत्री बनण्यासाठी नाही, तर देशसेवेसाठी राजेश्वर सिंह यांनी भारतीय जनता पक्षात प्रवेश केलाय. पंतप्रधान नरेंद्र मोदी, सीएम योगी आदित्यनाथ (CM Yogi Adityanath) यांच्या सरकारनं उज्ज्वला गॅस योजना, पीएम आवास योजना, सौभाग्य योजना, किसान सन्मान निधी योजना, शौचालय योजना सुरू केल्या आहेत. त्या कोणत्याही एका वर्गासाठी नसून संपूर्ण समाजासाठी आहेत.

विरोधी पक्षाचे नेते एकाच समाजातील लोकांचा विकास करत आहेत. मात्र, मोदी सरकार सर्व समाजातील लोकांचा विकास करत असल्याचेही त्यांनी सांगितले. कार्यक्रमाला राजेंद्र लोधी, भाजप जिल्हाध्यक्ष श्रीकृष्ण लोधी, माजी खासदार रीना चौधरी, भाजपचे ज्येष्ठ नेते राजेशसिंह चौहान आदी उपस्थित होते. भाजपचे उमेदवार राजेश्वर सिंह यांनी ईडीमध्ये असताना गुन्हेगार आणि भ्रष्टावर कारवाई केलीय. अवैधरित्या लुटलेली कोट्यवधी रुपयांची मालमत्ताही त्यांनी जप्त केलीय.