UP Election : बाबा का बुलडोझर’ हीट! | Sakal
sakal

बोलून बातमी शोधा

UP Assembly Election

UP Election : बाबा का बुलडोझर’ हीट!

नवी दिल्ली: ‘बाबा का बुलडोझर‘ हा उत्तर प्रदेशाच्या रणधुमाळीत परवलीचा शब्द बनला आहे. ‘सपची राजवट म्हणजे गुंड, माफियांची राजवट होती व योगी आदित्यनाथ सरकारने गेल्या ५ वर्षांत अशा अनेक गुंडांच्या हजारो कोटींच्या बेकायदा संपत्तीवर बुलडोझर फिरविला आहे` हा भाजपच्या प्रचाराचा अत्यंत ठळक भाग बनला आहे. किंबहुना पाचवा टप्प्यापासून भाजप उमेदवारांनी पोस्टरवरही ‘बाबा का बुलडोझर’चा मुक्त वापर सुरू केला आहे.

हेही वाचा: Uttar pradesh : नोएडात इलेक्ट्रॉनिक पार्क

योगी यांना सप नेते अखिलेश यादव उपरोधिकपणे बाबा म्हणतात. भाजपने हे नाव उलट अर्थाने प्रचारात आणण्यात यश मिळविले आहे. सप शासनकाळातील गुंडगिरीचा मुद्दा पंतप्रधान नरेंद्र मोदी, अमित शहा यांच्यापासून साऱ्याच भाजप नेत्यांनी प्रचारात वापरला आहे. योगी व त्यांच्या टीमने याला बुलडोझरची जोड दिली आहे. किंबहुना निवडणूक पूर्वांचलात पोचता पोचता यूपी भाजपचे चिन्ह कमळ आहे की बुलडोझर अशी शंका यावी असे वातावरण निर्माण झाले. सध्या गजाआड असलेले खासदार आझम खान, मुख्तार अन्सारी व अतीक अहमद या सप नेत्यांची नावे या संपूर्ण राज्यातील गुंडगिरीचे प्रतीक म्हणून भाजप वापरत आहे. ‘यूपी की मजबूरी है, बुलडोझर बहुत जरूरी है’ ही भाजपची प्रमुख घोषणाच बनली आहे. पण भाजपने या यंत्राचा वापर गरिबांना चिरडण्यासाठीच केला आहे, असाही आरोप आहे. भाजपच्या प्रचार विभागाचे प्रमुख व बिहारचे आमदार संजय मयूख यांच्या म्हणण्यानुसार, लोकांनीच योगींच्या बुलडोझरला उचलून धरले आहे. गरिबांना शोषणापासून मुक्त करून त्यांच्या विकासाचा मार्ग प्रशस्त केला हे पटल्यानेच प्रत्येक सभेत बुलडोझर उल्लेखांना चांगला प्रतिसाद मिळत आहे, असेही ते म्हणतात. योगी सरकारने बुलडोझरच्या साहाय्याने गुंडांची १८४८ कोटी रुपयांची बेकायदा संपत्ती जप्त करून पोलिसांनी त्यावर बुलडोझर फिरविला. सरकारने ते गरिबांसाठी वापरले असा भाजपचा प्रचार आहे.

हेही वाचा: Uttar Pradesh BJP | उत्तर प्रदेशमध्ये भाजपला आणखी धक्का ! पाहा व्हिडीओ

‘बुलडोझर थेअरी’ला प्रतिसाद

गेल्यावर्षी योगी म्हणाले होते की , आमच्याकडे एक विशेष मशीन आहे. ज्याचा उपयोग आम्ही राजमार्ग, एक्स्प्रेस महामार्ग बांधण्यासाठी केला. तसेच लोकांचे शोषण करणाऱ्या माफियांना चिरडून टाकण्यासाठीही आमचे डबल इंजिन सरकार काम करत आहे. याशिवाय योगी आदित्यनाथ हे विरोधक व गुंडांची ‘गर्मी‘ १० मार्चनंतर काढून टाकू, असा इशारा देत आहेत. यांच्या (सप) गुंडांवर कारवाईने तुम्ही आनंदी आहात? हा योगींचा प्रश्न जनता डोक्यावर घेत असल्याचे सांगून, त्यांच्या ‘बुलडोझर थिअरी’ला प्रतिसाद मिळत असल्याचा भाजपचा दावा आहे. या बुलडोझरचा इतका प्रभाव भाजपवर आहे, की भाजप नेत्यांच्या रोड शोमध्येही त्यांच्या गाड्यांच्या ताफ्यांच्यापुढे एक बुलडोझर चालविण्याची युक्ती भाजपने वापरली.

Web Title: Up Election Baba Bulldozer Heat

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..
go to top