बापरे! गाडी ढकलत नेणाऱ्या युवकाला आधी केली मदत अन् मग घडली भयंकर घटना  

नागपूर ः गाडी ढकलत नेणाऱ्या दुचाकीचालकाला तिघांनी मदतीचा हात दिला, अगदी पेट्रोलही भरून दिले. नंतर मात्र चाकूचा धाक दाखवून मोटारसायकल, मोबाईल आणि सहा हजारांची रोख हिसकावून नेली. मंगळवारी मध्यरात्री बेलतरोडी हद्दीत ही घटना घडली.

मूळचा उत्तर प्रदेशातील रहिवासी जितेंद्र मलिक (३५) हा कामाच्या निमित्ताने चिंचभवन परिसरातील खापरी पुनर्वसन भागात वास्तव्यास आहे. मंगळवारी मध्यरात्री तो घरी परतत असताना दुचाकीतील पेट्रोल संपले. यामुळे गाडी पायीच ओढत नेत होता. ले-मेरिडियन हॉटेलकडून वर्धा रोडकडे येणाऱ्या सिमेंट रोडवरील टी पॉइंटवर २० ते २५ वर्षे वयोगटातील तीन अनोळखी युवक मोटारसायकलने आले. 

नोकरीची हमी अन् ‘अर्धे तुम्ही, अर्धे आम्ही’; रोजगार सेवकांचा मनमानी कारभार; तरुणांची...

न विचारताच त्यांनी मदतीचा हात दिला. जितेंद्रला आपल्या मोटारसायकलवर बसवून घेतले आणि दोघांनी त्याची मोटारसायकल आपल्या ताब्यात घेतली. एका वाहनाने दुसरी गाडी ओढत ते कसेबसे खापरीतील पेट्रोलपंपावर पोहोचले. तिन्ही युवकांनी जवळचे पैसे देत पेट्रोल भरून घेतले. 

त्यानंतर जितेंद्रने आपल्याकडील पैसे देऊन गाडी घेण्याचा प्रयत्न केला असता तिघांपैकी एकाने चाकूचा धाक दाखवून मारहाण केली व त्याच्याकडील मोबाईल, मोटारसायकल व ६ हजार रुपये रोख असा एकूण ३८ हजारांचा मुद्देमाल हिसकावून नेला. या प्रकरणी बेलतरोडी पोलिसांनी जबरी चोरीचा गुन्हा दाखल करीत चोरट्यांचा शोध सुरू केला आहे.

संपादन - अथर्व महांकाळ