अबब! या शहरात लागते दररोज तीस हजार लिटर सॅनिटायझर

नागपूर : कोरोना विषाणूचा प्रार्दुभाव रोखण्यासाठी मोठ्या प्रमाणात सॅनिटायझरचा वापर होत आहे. शहरातील नागरिक हात स्वच्छ करण्यासाठी सरासरी तीस हजार लिटर सॅनिटायझर वापरत असल्याचे दिसून येत आहे. गेल्या काही दिवसांत सॅनिटायझरच्या विक्रीतही मोठी वाढ झाली असून राज्य सरकारने काही साखर कंपन्यांनाही उत्पादनाचा परवाना दिला आहे.

अवश्य वाचा - कोरोना पाठोपाठ या आजारानेही काढले डोके वर!

कोरोना विषाणूचा प्रकोप टाळण्यासाठी सॅनिटायझरचा वापर करण्याचा पर्यायही आहे. त्यामुळे कधी काळी केवळ लहान विद्यार्थ्यांच्या दप्तरात दिसणारे सॅनिटायझर आता प्रत्येकाच्याच खिशात, बॅगमध्ये दिसून येते आहे. प्रत्येकवेळी साबणाने हात स्वच्छ करणे शक्‍य नसल्याने अनेकजण सॅनिटायझरला पसंती देत आहेत. मोठ्या प्रमाणात सुरू असलेले शासकीय,निमशासकीय, खाजगी कंपन्या, अत्यावश्‍यक सेवेतील दुकानदार, कर्मचाऱ्यांचा वापरकर्त्यांमध्ये समावेश आहे. हे लोक जास्तीतजास्त वेळ कामानिमित्त बाहेर कार्यालय, दुकानांमध्ये आहेत. शहरातील दहापैकी चार नागरिक सॅनिटायझरचा वापर करीत असल्याचे दिसून येत आहे.

शहराची लोकसंख्या तीस लाखावर असून चाळीस टक्के नागरिकांचा विचार करता 12 लाख नागरिक सॅनिटायझरचा वापर करीत आहेत. एक व्यक्ती एका वेळेला किमान तीन मिलीलिटर सॅनिटायझरचा हात स्वच्छ करण्यासाठी वापर करीत आहे.

कोरोनाचा विषाणू कार्यालयातील टेबल, दाराची कडी, ग्रिल कुठल्याही 'सरफेस'वरून व्यक्तिवर हल्ला करू शकतात. त्यामुळे या ठिकाणी हात लावल्यास सॅनिटायझर वापरणे गरजेचे आहे. दिवसातून जवळपास आठ वेळा सॅनिटायझरचा वापर करीत असल्याचे महापालिकेतील एका कर्मचाऱ्याने नमुद केले. एक व्यक्ती दिवसातून आठ वेळा तीन मिलिलिटर सॅनिटायझर वापरत आहे. अर्थात त्याला दिवसातून 24 मिलिलिटर सॅनिटायझरची गरज आहे. 12 लाख नागरिकांचा विचार केल्यास शहरात 28 हजार 800 लिटर सॅनिटायझरचा वापर होत आहे.

सुरुवातीला सॅनिटायझरचा अचानक वापर वाढल्याने तुटवडा निर्माण झाला. नामांकित कंपन्यांच्या जेल स्वरुपातील सॅनिटायझरचा अद्यापही तुटवडा आहे. मात्र, काही दारू कंपन्यांनीही सॅनिटायझरच्या निर्मितीवर भर दिला. याशिवाय राज्य सरकारनेही काही साखर कारखान्यांना सॅनिटायझर निर्मितीची परवानगी दिली. परिणामी आता पाण्यासारखे सॅनिटायझर उपलब्ध आहेत. विविध शासकीय, निमशासकीय, खाजगी कंपन्यांचे कार्यालय, दुकानांमध्ये हेच सॅनिटायझर वापरासाठी ठेवले आहे. सॅनिटायझरचा वापर होत असला तरी मोठ्या प्रमाणात नागरिक संचारबंदीमुळे घरीच आहे. याशिवाय काही कंपन्यांनी घरून काम करण्याची परवानगी कर्मचारी, अधिकाऱ्यांना दिल्याने तेही घरीच असल्याने घरातील साबणाचाच हात स्वच्छ करण्यासाठी वापर करीत आहे.

हात स्वच्छ करणे आवश्यक
सरासरी तीन मिलिलिटर सॅनिटाझरचा हात स्वच्छ करण्यासाठी वापर केला जातो. कोरोनाचा विषाणू दार, खिडक्‍या, टेबल यासारख्या कुठल्याही 'सरफेस'वर राहू शकतो. त्याला हात लागल्यानंतर स्वच्छ करण्यासाठी सॅनिटायझरचा पर्याय आहे. परंतु नागरिकांनी साबणानेच हात स्वच्छ करण्यास प्राधान्य दिले पाहिजे.
- डॉ. प्रदीप दासरवार, आरोग्य अधिकारी, स्वच्छता, महापालिका.