रात्रीस खेळ चाले! खासगीतून हलविलेल्या ९० टक्के कोरोनाबाधितांचा मृत्यू

नागपूर : कोरोनाचा शिरकाव होताच साऱ्या खासगी रुग्णालयांनी खासगी रुग्णसेवा बंद केली. कोरोनावरील उपचारासाठी एकही खासगी डॉक्टर पुढे आले नाही. मात्र, खासगी रुग्णालयांना कोरोनाच्या रुग्णांवर उपचार करण्यास परवानगी मिळाली. खासगी रुग्णालये उपचार करू लागली. मात्र, कोरोनाचा रुग्ण गंभीर होताच मेडिकल, मेयोत रेफर करण्यात येत होती. विशेष असे की, रेफर करण्याची वेळ मध्यरात्रीनंतरची होती. रेफर करण्याचा हा रात्रीस खेळ चाले. मृत्यू कमी दाखवण्याची खासगी रुग्णालयांची क्लृत्पी ओळखता आली नाही. मृत्यूचा टक्का वाढल्यानंतर खासगीचे खरे रुप मेडिकल, मेयो प्रशासनाला दिसले. 

हेही वाचा - दर दहा मिनिटाला हलतो पाळणा; नागपुरात दिवसाला सरासरी दीडशे बालकांचा जन्म 

लवकर बरे व्हावे, या हेतूने अनेक कोरोनाबाधित रुग्ण खासगीतील उपचाराला पसंती देतात. परंतु, खासगीत उपचार करताना पैसा संपल्यानंतर मात्र रुग्णाला गंभीर स्थितीत मेडिकल-मेयोत रेफर केले जात होते. खासगी रुग्णालयाच्या अ‌ॅम्बुलन्समधून मध्यरात्रीनंतर रुग्णाची स्थिती गंभीर झाल्याचे कारण पुढे करीत रेफर करण्यात येत होते. उपचार खासगीत मृत्यू मात्र मेयो-मेडिकलमध्ये होत असल्याने मेयो, मेडिकलमधील मृत्यूच टक्का वाढला. यामुळे ही चिंता जिल्हा प्रशासनानेही व्यक्त केली. यानंतर खरा प्रकार पुढे आला. मध्यरात्री एका रुग्णालयातून दर दिवसाला कोरोनाचा एक रुग्ण रेफर करण्यात येत होता. त्या रुग्णाचा पुढे अवघ्या काही तासांमध्ये किंवा एक दिवसानंतर मृत्यू होत होता. मेडिकलमध्ये कोरोनाचे १ हजार ६५३ मृत्यू झाले. यातील रेफर करण्यात आलेल्या ३१५ कोरोनाबाधितांपैकी २८३ मृत्यू हे खासगी रुग्णालयातून रेफर करण्यात आलेल्या कोरोनाबाधितांचे आहेत. तर ३१६ कोरोनाबाधित मृतावस्थेत मेडिकलमध्ये आणण्यात आले. मात्र, मृत्यूची नोंद मेडिकलमध्ये झाल्याने, येथील मृत्यूचा टक्का वाढला असल्याचे दाखवण्यात आले. हीच स्थिती मेयो रुग्णालयातील आहे. मेयोत १ हजार १५९ मृत्यू झाले असून यातील २४० मृतावस्थेत मेयोत आले. तर अडीचशेवर मृत्यू हे रेफर करण्यात आलेल्या कोरोनाबाधितांचे असल्याची माहिती पुढे आली आहे. 

हेही वाचा - टिनाच्या शेडात पाच मुली, माय आणि आजी, चार...

केंद्रीय पथकाच्या निदर्शनास -
खासगी रुग्णालयांना कोरोनाचा नव्हेतर इतरही आजाराचे रुग्ण हलवताना कोणतेही नियम महापालिकेने घालून दिले नसल्याचा धक्कादायक प्रकार पुढे येत आहे. यामुळेच केंद्रीय आरोग्य पथकाच्या निदर्शनात हा प्रकार मेडिकल- मेयोच्या रुग्णालय प्रशासनाकडून आणून देण्यात आला. यानंतर याची दखल घेण्यात आली. मेयोतही अडीचशेच्या वर खासगीतून रेफर झालेल्यांचे मृत्यू झाल्याचे एका अधिकाऱ्याने नाव न टाकण्याच्या अटीवर सांगितले.