नागपूर शहरात आणखी 6 जणांना कोरोना; प्रशासनाची वाढली चिंता 

नागपूर : नागपुरात कोरोनाचा फास घट्ट आवळला जात असून बाधितांचा आकडा अर्धशतकाकडे झेपावत आहे. रविवारी एकाच दिवशी 14 जण कोरोनाबाधित आढळून आले. यानंतर लगेच रविवारी मध्यरात्री तिघांना तर सोमवारी दुपारी तिघांना कोरोनाची बाधा झाल्याचे मेयो-मेडिकलच्या अहवालातून स्पष्ट झाले. यामुळे कोरोनाबाधितांच्या संख्येत आणखी सहाने वाढ झाली. सध्या मेडिकलमध्ये 24 तर मेयोत 14 कोरोना बाधितांवर उपचार सुरू आहेत. बाधितांचा आकडा 47 वर पोहोचला असल्याने प्रशासनाने चिंता व्यक्त केली आहे. 

मरकजशी संबंधित असलेल्या 3 जणांमध्ये कोरोना विषाणूचे संक्रमण असल्याचे मेयोच्या प्रयोगशाळेच्या तपासणी अहवालातून पुढे आले आहे. त्याच्या काही तासांनी मध्यरात्रीला मेडिकलच्या प्रयोगशाळेत सरतंजीपुरा परिसरातील आणखी तीन महिलांना कोरोना असल्याचे निदान झाले. या सगळ्यांना सक्तीने मेयोत दाखल करण्यात आले होते. त्यानंतर काही तासांनी मेयोच्या प्रयोगशाळेत आणखी तीन जणांना कोरोना असल्याचे पुढे आले. गेल्या दोन ते तीन दिवसांमध्ये आमदार निवास, लोणारा येथे सक्तीने विलगीकरणात असलेल्यांपैकी अनेकजण कोरोनाबाधित असल्याचा अहवाल येत असल्यामुळे प्रशासन हादरले आहे. विलगीकरणातील संशयितांनाही धोका असल्याची भीती व्यक्त केली जात आहे. दरम्यान, येथे मरकजशी संबंधित अनेकांनी विलगीकरणाच्या नियमाला हरताळ फासला आहे. एकत्र फिरणे, जेवण करणे असे नियमबाह्य कृत्य होत असल्याचे पुढे आले. त्यामुळे आता या रुग्णांच्या संपर्कामुळे इतर कुणाला कोरोना होतो की, काय अशी भीती व्यक्त करण्यात येत आहे. 

अवश्य वाचा- हम होंगे कामयाब! `या` विद्यापीठाने कोरोनाशी लढण्यासाठी उचलले असे पाऊल! 

आईसह दोन मुलींना कोरोना

कोरोनाबाधितांच्या संख्येत भर पडत असताना रुग्णाच्या संपर्कातील सतरंजीपुरातील अनेकांना महापालिकेच्या आरोग्य विभागाने खबरदारीचा उपाय म्हणून मेडिकल, मेयोत दाखल केले आहे. त्याचप्रमाणे इतर ठिकाणीही सक्तीने विलगीकरणात ठेवले आहे. यापैकी एका 42 वर्षीय मातेसह तिच्या 14 आणि 15 वर्षांच्या दोन्ही मुलींना कोरोनाची लागण झाल्याचे पुढे आले. या मायलेकींवर मेयोत त्यांच्यावर उपचार सुरू आहे.