...आणि धावत्या रेल्वेतच तिला येऊ लागल्या प्रसूतिकळा! मग काय झाले, वाचा

नागपूर : कोरोनाचा उद्रेक लक्षात घेता रविवारी "जनता कर्फ्यू' पाळण्यात आला. या पार्श्‍वभूमीवर रेल्वेगाड्याही रद्द करण्यात आल्या होत्या. केवळ पहाटे 4 पूर्वी निघालेल्या रेल्वेगाड्याच आज धावल्या. त्यातीलच नागपूरमार्गे धावणाऱ्या एका रेल्वेतून प्रवास करणाऱ्या गर्भवती महिलेला अचानक प्रसूतिकळा सुरू झाल्या. सोबत असलेल्या पतीने तिला नागपुरात उतरवून घेतले. रेल्वे कर्मचाऱ्यांच्या मदतीने तिला मेयो रुग्णालयात दाखल करून वैद्यकीय उपचार मिळवून देण्यात आले.

प्राप्त माहितीनुसार, खडगपूर येथील रहिवासी रिजौल सरफुद्दीन खान कामानिमित्त मुंबईत राहतात. त्यांच्या पत्नीला डॉक्‍टरांनी प्रसूतीची तारीख 28 मार्च दिली होती. प्रसूती गावाकडे व्हावी, म्हणून ते पत्नीला घेऊन जात होते. रेल्वेचे थेट तिकीट उपलब्ध नसल्याने त्यांनी सोलापूर ते खडगपूरचे 02055 सोलापूर-वाराणसी हॉलीडे स्पेशल ट्रेनचे एसी कोच ए-2चे तिकीट मिळविले. दोघेही पनवेल येथून खडकपूरला जाण्यासाठी या रेल्वेतून निघाले. नागपूर येण्यापूर्वीच पत्नीला प्रसवकळा सुरू झाल्या. त्यांनी कसेबसे पत्नीला सावरले. पण, गाडीत फारशा महिला नव्हत्या. शिवाय, नागपूरनंतर बराच वेळ मोठे स्थानक नसल्याचे त्यांना माहीत होते. यामुळे त्यांनी पत्नीसोबत नागपुरातच उतरण्याचा निर्णय घेतला. दुपारी 3 वाजताच्या सुमारास ही गाडी नागपूर स्थानकावर पोहोचताच त्यांनी रेल्वे कर्मचाऱ्यांकडे मदतीची याचना केली.

सविस्तर वाचा - रशियाहून आला नि थेट पकडली ट्रेन, नागपूर येताच झाले असे

कर्मचाऱ्यांच्या मदतीने पत्नीला खाली उतरवून घेतले. त्यानंतर रेल्वेच्या रुग्णवाहिकेतून महिलेला मेयो रुग्णालयात पोहोचविण्यात आले. वेळीच वैद्यकीय उपचार मिळाल्याने संभाव्य धोके टळले. सहकार्यासाठी रिजौल यांनी कर्मचाऱ्यांचे आभार मानले.