‘त्या’ दोन्ही बहिणींचा आजारपण व कुपोषणाने मृत्यू; अनेक दिवसांपासून बंद घरात आढळले होते कुजलेले मृतदेह

कामठी (जि. नागपूर) : बंद घरात बुधवारी (ता. ६) अविवाहित दोन बहिणीचे मृतदेह मिळाले होते. त्या दोन्ही बहिणींचा मृत्यू आजारपण व कुपोषणाने झाला असल्याचा प्राथमिक अंदाज उपजिल्हा रुग्णालयाच्या डॉक्टरांनी व्यक्त केला आहे.

जुनी कामठी पोलिस ठाण्याच्या हद्दीतील दाळओळी नंबर २ येथे एका बंद घरात पद्मा नागोराव लवटे (वय ६०) व कल्पना नागोराव लवटे (वय ५०) या बुधवारी दुपारी एकच्या सुमारास मृतावस्थेत आढळल्या. शेजाऱ्यांनी लगेच जुनी कामठी पोलिस ठाण्यात घटनेची माहिती दिली. पलंगावर कल्पना नागोराव लवटे (५०), पलंगाच्या खाली जमिनीवर पद्मा नागोराव लवटे (६०) या दोघींचे मृतदेह कुजलेल्या अवस्थेत दिसून आले.

नागपूर जिल्ह्यातील ताज्या बातम्यांसाठी क्लिक करा

दोन्ही कुजलेल्या मृतदेहांचा पंचनामा करून मृतदेह पोलिसांनी उत्तरीय तपासणीसाठी उपजिल्हा रुग्णालयात पाठवले. शेजाऱ्यांकडून माहिती घेतली असता पद्मा व कल्पना या दोघी सख्या बहिणी असून उच्चशिक्षित होत्या. दहा वर्षांपूर्वी त्यांचे आई-वडील मरण पावले. त्यानंतर त्यांनी धुनीभांडी व मिळेल ते काम करून उदरनिर्वाह करीत होत्या.

परिस्थिती हलाखीची असताना शेजारी व इतर कोणत्याही नातेवाइकांकडून कोणतीही आर्थिक मदत न घेता दोन्ही बहिणी घराचे दार बंद करून घरात राहत होत्या. शेजारी व इतर कोणाशी त्यांचा संबंध नव्हता. म्हणून शेजाऱ्यांनी त्या दोन्ही बहिणी घरातच असतील असे वाटत होते. अविवाहित बहिणींचा कुजलेल्या अवस्थेत मृतदेह मिळाल्याने शहरात सर्वत्र खळबळ उडाली.

पोलिसांनी पंचनामा करून दोन्ही मृतदेह कामठी उपजिल्हा रुग्णालयात शवविच्छेदनासाठी पाठविले. गुरुवारी दुपारी एकच्या सुमारास कामठी उपजिल्हा रुग्णालयाचे डॉ. एस. के. वाघमारे यांनी शवविच्छेदन करून दोन्ही मृतदेह त्यांच्या नातेवाइकांच्या स्वाधीन केले. नातेवाईकांनी राणीतलाव मोक्षधाम येथे अंत्यसंस्कार केले.

जाणून घ्या - 'तिच्या' घरी सुरु होती लग्नाची लगबग पाहुणेही होते तयार; तेवढ्यात आला फोन अन् एका क्षणात सगळंच संपलं

धाकट्या बहिणींचे बयाण

मृत पद्मा व कल्पनाच्या धाकट्या बहिणी सुनिता नरेंद्र कंटाळे (वय ३५, रा. इंदोर मध्यप्रदेश), अर्चना विजय इल्लपुरकर (वय ४०, रा. बुलढाणा) गुरुवारी दुपारी कामठी उपजिल्हा रुग्णालयात हजर झाल्या. त्यांना ठाणेदार विजय मालचे यांनी पद्मा व कल्पना संदर्भात माहिती विचारली असता कल्पना थोडी मानसिक रुग्ण असल्याचे त्यांनी सांगितले.

पद्मा उच्चशिक्षित होती. मिळेल ते काम करून उदरनिर्वाह करीत होती. दहा वर्षापूर्वी आईवडील मरण पावले, तेव्हापासून आम्ही कामठीला आलो नाहीत. त्यांची भेट सुद्धा झाली नाही. रेखाच्या तक्रारीवरून जुनी कामठी पोलिस ठाण्यात अकस्मात मृत्यूची नोंद केली असून, पुढील तपास पोलिस उपनिरीक्षक एस. जी. पाटील करीत आहे.

संपादन - नीलेश डाखोरे